Хоккейн дэлхийн аварга шалгаруулах тэмцээний шөвгийн наймын шатанд Данийн шигшээ баг Канадын хүчирхэг багийг 2:1 харьцаагаар буулган авч, шуугиан тарьлаа. Тоглолт Данийн Хернинг хотод болж, тоглолтын сүүлийн минутуудад Николай Элерс (58 дахь минут), Ник Олесен (60 дахь минут) нарын гоолоор Даничууд ялалт байгуулав. Канадын цорын ганц гоолыг Трэвис Сэнхайм 46 дахь минутанд оруулсан юм.

Энэ ялалтаар Дани хагас шигшээд Швейцартай тоглохоор болсон бол Канадын баг хоёр дараалсан ДАШТ-ийг медальгүй өндөрлүүллээ. Өнгөрсөн онд тэд хүрэл медалийн төлөө Шведэд 2:4-өөр хожигдож байсан.

Канадын энэ удаагийн бүрэлдэхүүнд Стэнлийн цомын гурван удаагийн аварга, Олимпын хошой аварга Сидни Кросби, 2022 оны Стэнлийн цомын эзэн Натан Маккиннон, 2024 оны драфтын тэргүүн сонголт Маклин Селебрини нар багтсан ч хүссэн үр дүнд хүрч чадсангүй. Тэд А хэсгээс нэгээр шалгарсан бол Данийн баг В хэсэгт 4-р байрт бичигдэж байв.

Түүх сөхвөл, 1949 оны ДАШТ-ий үеэр Канадын баг Данийг 47:0 харьцаагаар бут ниргэж байжээ. Гэвч өнөөдөр Дани түүхэн хожлыг авч, 28 удаагийн дэлхийн аварга Канадын багийг тэмцээнээс мулталсан нь онцлох үйл явдал боллоо.

Харин хагас шигшээ шатны бусад тоглолтод Шведийн шигшээ баг өнгөрсөн оны дэлхийн аварга Чехийг 5:2-оор хожиж, АНУ-тай тоглохоор боллоо. Уг тоглолтод Шведийн Лео Карлссон (13, 35), Лукас Рэймонд (17, 20), Филип Форсберг (56), Чехийн Роман Червенка (24), Михал Шпачек (49) нар гоолдсон юм.

Хагас шигшээ тоглолтууд тавдугаар сарын 24-нд, финал болон хүрэл медалийн төлөөх тоглолтууд 25-нд Стокхольм хотноо болно.

Эх сурвалж: ТАСС