Норвегийн Драммен хотод болсон пауэрлифтингийн хэвтээ шахалтын дэлхийн аварга шалгаруулах тэмцээнд Монгол Улсын баг тамирчид найман медаль хүртэж, тив дэлхийн тавцанд бахдам амжилт гаргалаа. Тэмцээнд Гавьяат дасгалжуулагч Д.Баттулгын удирдлага дор оролцсон манай баг өндөр амжилтаар эх орныхоо нэрийг дэлхийн спортын тавцанд дуурсгав.

Эрэгтэйчүүдийн 93 кг-ын жинд Г.Оргилболд 227.5 кг шахаж алтан медаль хүртэн төрийн дууллаа эгшиглүүлж, энэ тэмцээнд дөрөв дэх удаагаа дараалан аваргалсан анхны монгол тамирчин боллоо.

Мөн -120 кг-ын жинд паралимпын гурван медальт, Хөдөлмөрийн баатар Э.Содномпилжээ 250 кг-ыг шахаж мөнгөн медаль хүртсэн нь түүний ДАШТ-ий найм дахь медаль бөгөөд үүний тав нь мөнгө ажээ.

Бусад ангилалд медаль хүртсэн тамирчид:

• Өсвөрийн ангилал, 53 кг – Э.Дашдондог – алт

• Өсвөрийн ангилал, 83 кг – О.Цэнгэлбаяр – хүрэл

• Мастер-1 ангилал, 93 кг – Ц.Отгондалай – алт

• Мастер-2 ангилал, 93 кг – Х.Баттөмөр – хүрэл

• Мастер-2 ангилал, 74 кг – Х.Амарсанаа – мөнгө

• Мастер-3 ангилал, 66 кг – Л.Батсайхан – хүрэл

Энэхүү амжилт нь Монголын пауэрлифтингийн спортыг олон улсад тогтмол таниулж, хүчний төрлийн спортоор монгол тамирчид тогтмол дэлхийн дэвжээнд амжилт үзүүлж байгааг дахин баталлаа.

Эх сурвалж: Монголын Пауэрлифтингийн Нэгдсэн Холбоо