Монголын сагсан бөмбөгийн спортод шинэ түүх бичигдэж, “Хасын Хүлэгүүд” баг Зүүн Азийн Супер лиг (EASL)-т оролцох анхны монгол баг болж тодорлоо. Энэ нь тус багийн 21 жилийн оргил амжилтын нэг бөгөөд олон улсын тавцанд Монголын сагсан бөмбөгийн чансааг харуулах хариуцлагатай үүрэг хүлээж байна.
2024–2025 оны Монголын үндэсний дээд лигийн аваргаар тодорсон “Хасын Хүлэгүүд” баг энэ удаагийн түрүүлэлтээрээ ес дэх удаагаа аваргын цомыг өргөсөн бол сүүлийн хоёр улирал дараалан түрүүлсэн амжилтаар ялгарч байна. Финалын тоглолтын Үнэ цэнтэй тоглогчоор (MVP) багийн тоглогч Ян Миллер шалгарчээ.
Зүүн Азийн Супер лиг нь бүс нутгийн хамгийн өндөр чансаатай мэргэжлийн багуудын өрсөлддөг тэмцээн бөгөөд 2025–2026 оны улиралд оролцох эрхийг МСБХ, EASL-ийн байгуулсан урт хугацааны хамтын ажиллагааны гэрээний дагуу Монголын дээд лигийн аваргад олгохоор заасан. Тус эрхийг ийнхүү “Хасын Хүлэгүүд” албан ёсоор авсан нь Монголын сагсан бөмбөгийн спортын хувьд олон улсын түвшинд шинэ хуудас нээж буй үйл явдал болж байна.
Монголын Сагсан Бөмбөгийн Холбооны Ерөнхий нарийн бичгийн дарга С.Төгсжаргал “Энэ бол зөвхөн нэг багийн амжилт биш, бүх монгол сагсан бөмбөгчдийн хамтын хичээл зүтгэлийн үр дүн юм. Бид Хүлэгүүд багийн олон улсын тэмцээнд хэрхэн өрсөлдөхийг харж, бахархах цаг ирлээ” хэмээн онцоллоо.
Мөн “Хасын Хүлэгүүд” баг энэ сарын 30, 31-нд Улаанбаатар хотын “М банк арена”-д Азийн аваргуудын лигийн хагас шигшээ тоглолтоо хийхээр бэлтгэж байна. Тус тоглолт нь тивийн шилдэг багуудтай өрсөлдөх эхлэл бөгөөд EASL-т оролцохоос өмнөх чухал сорилт байх юм.
Эх сурвалж: Монголын Сагсан Бөмбөгийн Холбоо
