Дэлхийн бөхийн нэгдсэн холбооноос жил бүр зохион байгуулдаг өндөр зэрэглэлийн зургаан тэмцээний нэг болох чансааны оноо олгох цувралын тэмцээн энэ удаа Монгол Улсад болно. “Улаанбаатар опен” нэртэй уг тэмцээн тавдугаар сарын 29-нөөс зургадугаар сарын 1-ний хооронд Буянт-Ухаа спортын ордонд зохиогдох бөгөөд дэлхийн 17 орны 350 гаруй шилдэг тамирчин оролцохоор бүртгүүлээд байна.

Тэмцээний шагналын сан 400 сая төгрөг бөгөөд зохион байгуулагч улсын хувиар Монгол Улс жингийн ангилал тус бүрт тав хүртэлх бөхийг оролцуулах эрхтэй. Монголын талаас нийт 120 тамирчин оролцохоор бэлтгэл сургуулилтаа хангаж байгаа юм.

“Улаанбаатар опен” нь олимпын эрхийн оноо цуглуулах, дэлхийн чансаанд нөлөөлөх чухал тэмцээнүүдийн нэг. Чансааны оноо нь тухайн жилийн шилдэг бөхчүүдийг тодруулах, тивийн аваргын толгой бөхчүүдийг нэрлэх, олимп болон дэлхийн аваргад сугалааны “seed” буюу хэсэг толгойлох эрхийг тодорхойлоход хэрэглэгддэг.

Энэ жилийн тэмцээн сонгомол бөхийн 55–130 кг, эмэгтэйчүүдийн 50–76 кг, чөлөөт бөхийн 57–125 кг хүртэлх нийт гучин жингийн ангиллаар явагдана. Дэлхийн бөхийн холбоо 2019 онд чансааны оноо олгох журамд шинэчлэл оруулж, энэхүү олон улсын хэмжээний цувралыг эхлүүлсэн нь олон орны бөхчүүдийн дунд өрсөлдөөнийг нэмэгдүүлж, олимпын болон дэлхийн аваргуудыг илүү бодит үнэлгээгээр тодруулах үндэс болсон юм.

Эх сурвалж: United World Wrestling, МҮОХ