Монголын Хүүхдийн спортын VIII их наадмын зуны төрөлд оролцох Хөвсгөл аймгийн баг тамирчдад амжилт хүсэх хүндэтгэлийн ёслол өнөөдөр Мөрөн суманд боллоо. Энэхүү ёслол нь хүүхэд, залуучуудын спортыг дэмжих, орон нутгийн нэр хүндийг өргөх, тамирчдад урам зориг өгөхөд чиглэсэн онцгой арга хэмжээ байв.

Энэ удаагийн наадамд Хөвсгөл аймгаас 19 спортын төрөлд 219 сурагч тамирчин, тэднийг дагалдан 22 багш, дасгалжуулагч буюу нийт 244 хүн оролцохоор шалгарсан байна.

Ёслолын үеэр аймгийн туг болон Биеийн тамир, спортын газрын тугийг 2019, 2023 оны Хүүхдийн спортын их наадмын аварга, ДМЦС-ийн сурагч Э.Мөнх-Ундрал болон волейболын шигшээ багийн тамирчдад хүндэтгэлтэйгээр гардуулж, тэмцээнд амжилттай оролцохыг ерөөв.

Тус арга хэмжээнд Хөвсгөл аймгийн Засаг даргын орлогч Ц.Гансүх, ЗДТГ-ын Нийгмийн бодлогын хэлтсийн дарга Д.Цэцэгмаа, Биеийн тамир, спортын газрын дарга Б.Баярсайхан, мөн спорт, залуучууд хариуцсан мэргэжилтэн Б.Очирсүх нар оролцож, баг тамирчдад амжилт хүсэн мэндчилгээ дэвшүүллээ.

Мөн өнгөрсөн онд амжилт гаргасан тамирчдад мөнгөн урамшууллын батламж гардуулсан бол аймгийн Засаг дарга Л.Төмөрбаатарын санаачилгаар нийт 19 сая 950 мянган төгрөгийн үнэ бүхий бэлтгэлийн хувцас баг тамирчдад хүндэтгэлтэйгээр гардуулан өгч, амжилт хүссэн юм.

Энэхүү наадам нь хүүхэд, өсвөр үеийнхний спортын авьяасыг хөгжүүлэх, багийн ажиллагааг төлөвшүүлэх, улс, орон нутгийн хэмжээнд нэр алдараа дуурсгах чухал боломжийг олгож байгааг албаны хүмүүс онцоллоо.

Эх сурвалж: Хөвсгөл аймгийн ЗДТГ, Биеийн тамир, спортын газар