Английн “Тоттенхэм Хотспур” баг Европын лигийн 2024 оны тэмцээний финалд “Манчестер Юнайтед”-ыг 1:0 харьцаагаар ялж, аваргын цомыг хүртлээ. Тоглолт Испанийн Бильбао хотын “Сан-Мамес” цэнгэлдэх хүрээлэнд болж, 42 дахь минутанд Бреннан Жонсон оруулсан цорын ганц гоолоор шийдэгдсэн юм.
Ингэснээр “Тоттенхэм” Европын клубүүдийн дунд явагддаг хоёр дахь том тэмцээн болох Европын лигт анх удаагаа түрүүлж байна. Өмнө нь тус баг 1972 онд УЕФА-гийн цомын аварга болж, 1984 онд мөн финалд шалгарч байсан боловч энэ удаа шинэ нэршлийн дор анх удаа цомыг өргөлөө. Үүний үр дүнд 2024-2025 оны улиралд Аваргуудын лигийн хэсгийн шатанд шууд оролцох эрхтэй болж байна.
Харин “Манчестер Юнайтед” баг Европын лигийн финалд гурав дахь удаагаа шалгарсан ч энэ удаа цомын төлөө дахин амжилт гаргаж чадсангүй. Тус баг 2017 онд уг тэмцээнд аваргалж байсан түүхтэй.
Онцлох нь, хоёр баг хоёулаа Английн Премьер лигийн хүснэгтийн доод хэсэгт бичигдэж байгаа юм. “МЮ” 39 оноотой 16 дугаарт, “Тоттенхэм” 38 оноотой 17 дугаарт бичигдэж байна. Улсын аварга шалгаруулах тэмцээний ийм хойгуур байрт буй багууд Европын лигийн финалд шалгарсан нь урьд өмнө тун ховор тохиолдол бөгөөд өмнө нь зөвхөн Испанийн “Севилья”, Английн “Фулхэм” багууд 12 дугаарт байхдаа ижил амжилтад хүрч байжээ.
Европын лиг нь 1971-2010 он хүртэл УЕФА-гийн цом нэрээр явагддаг байсан бөгөөд Европын клубүүдийн дунд Аваргуудын лигээс дараагийн эрэмбэтэй хэмээн тооцогддог. 2023 оны аварга нь Италийн “Аталанта” баг байв.
Түүнчлэн Оросын багуудаас Москвагийн ЦСКА 2005 онд, Санкт-Петербургийн “Зенит” 2008 онд тус тэмцээнд түрүүлж байсан удаатай.
Эх сурвалж: ТАСС.
