Дэлхийн шатрын түүхэнд анх удаа 143 мянган оролцогчтой халз тулаанд орсон домогт их мастер Магнус Карлсен дэлхий даяарх шатар сонирхогчдын эсрэг хийсэн цахим тоглолтоо тэнцээгээр дуусгалаа. “Chess.com” платформын зохион байгуулсан уг тоглолт “Магнус Карлсен vs. Дэлхий” нэртэйгээр дөрөвдүгээр сарын 4-нд эхэлсэн бөгөөд оролцогч бүр дараагийн нүүдлийг санал хураалтаар шийдвэрлэж, өдөр бүр нэг нүүдэл хийж байв.

Шатар сонирхогчдын хамтын шийдвэрийн эсрэг 34 настай Норвегийн их мастер ганцаараа тоглосон бөгөөд тоглолт зургаан долоо хоног гаруйн хугацаанд үргэлжилсний эцэст даваа гарагт албан ёсоор дуусч, тэнцээгээр шийдэгдсэн байна.

Магнус Карлсен энэ талаар сэтгэгдэл хуваалцахдаа “Тоглолтын эхэнд би илүүрхэж байна гэж бодсон ч удалгүй тэд надад боломж олгосонгүй” хэмээн хүлээн зөвшөөрсөн.

Карлсен 2013-2023 оны хооронд дэлхийн аваргын титмийг хадгалж, түүхэн дэх хамгийн шилдэг шатарчдын нэгээр нэрлэгдсэн байдаг.

Ийм төрлийн тоглолт өмнө нь ч болж байв. Тухайлбал, Оросын дэлхийн аварга асан Гарри Каспаров 1999 онд 50 мянган шатар сонирхогчтой тоглож байсан бол Энэтхэгийн Вишванатан Ананд 2023 онд 70 мянга орчим хүний эсрэг тоглосон юм. Гэвч энэ удаагийн 143 мянган оролцогчтой тоглолт нь тоогоороо дээд амжилт тогтоосон түүхэн халз тулаан боллоо.

Эх сурвалж: AFP