Улсын нэгдүгээр төв эмнэлэг (УНТЭ)-ийн дотоод шүүрлийн мэс заслын баг анх удаа Монгол Улсад амны хүрцээр буюу TOETVA (Transoral Endoscopic Thyroidectomy Vestibular Approach) аргаар бамбай булчирхайн зангилаа авах дурангийн мэс заслыг амжилттай хийжээ. Энэхүү мэс заслыг УНТЭ-ийн эмч М.Баярмагнайгаар ахлуулсан баг хоёр хүнд амжилттай хийж гүйцэтгэсэн байна.
TOETVA арга нь арьсан дээр ил зүслэг хийлгүй, амны хөндийгөөр дамжин дурангийн тусламжтайгаар зангилааг авах боломжтой дэлхийн дэвшилтэт мэс заслын технологийн нэг бөгөөд Ази болон Европын орнуудад өргөн хэрэглэгддэг аргачлал юм.
Тус мэс заслын хамгийн том давуу тал нь өвдөлт бага, эдгэрэлт хурдан, арьсан дээр сорвигүй үлдэх боломжтойгоороо онцлог бөгөөд гоо сайхны хувьд эмчлүүлэгчдэд сэтгэл ханамж өндөртэй эмчилгээний нэг хэлбэрт тооцогддог.
Эх сурвалж: Улсын нэгдүгээр төв эмнэлэг
