Хүний эрхийн Үндэсний Комиссоос “Хүүхэд бүр ялагч — Хүүхэд бүр хамгаалагч” уриан дор хүүхдийн марафоныг хоёр дахь удаагаа 2025 оны тавдугаар сарын 31-ний өдөр Үндэсний цэцэрлэгт хүрээлэнгийн “Цагдаа” талбайд зохион байгуулах гэж байна.

Энэхүү гүйлтийн арга хэмжээ нь 6-17 насны хүүхдүүдийг хамрах бөгөөд цахим бүртгэл тавдугаар сарын 28-ныг дуустал үргэлжилнэ. Тус үйл ажиллагаа нь үе тэнгийн дээрэлхэлт, ялгаварлан гадуурхалттай тэмцэх, хүүхдийн эрхийн зөрчлөөс урьдчилан сэргийлэх, зөв хандлага, соёлыг төлөвшүүлэх зорилготой.

Арга хэмжээнд оролцсон хүүхэд бүр дараах боломжуудыг эдлэх юм:

• Барианд орж буй торгон агшнаа мэргэжлийн гэрэл зурагчны дуранд мөнхлүүлэх

• Нүүр хувиргагчаар нүүрээ будуулах

• Үлгэр, киноны баатруудтай дурсгалын зураг авахуулах

• “Хүслийн хайрцаг”-т өөрийн хүсэл мөрөөдлөө шивнэх

• Авьяаслаг хүүхдүүдийн урлагийн тоглолт, хүний эрхийн интерактив контент үзэж сонирхох

• The Open Mic арга хэмжээнд оролцох

Энэхүү үйл ажиллагаа нь хүүхдүүдийн оролцоо, мэдлэг, сэтгэлгээ, авьяасыг хөгжүүлэхээс гадна тэднийг өөрсдийгөө хамгаалах, бусдад урам зориг өгөх хандлагатай иргэн болж төлөвшихөд чухал хувь нэмэр оруулах юм.