Дэлхийн хамгийн өндөр цэг гэгддэг, далайн төвшнөөс дээш 8848 метр өндөр Эверестийн оргилд Монголын уулчид болох олон улсын хэмжээний мастер А.Баттогтох, Б.Батхишиг нар 2025 оны тавдугаар сарын 19-ний өдөр амжилттай гарч, Монгол Улсын уулын спортын түүхэнд нэрээ мөнхөллөө. Тэд ийнхүү дэлхийн дээвэрт хүрсэн Монголын 15, 16 дахь уулчин болж байна.

Хоёр уулчин өнгөрсөн долоо хоногт авиралтаа эхлүүлсэн бөгөөд байгаль цаг агаарын эрсдэлтэй нөхцөлд олон хоногийн бэлтгэл, дасан зохицолт хийсний үндсэн дээр зорьсон оргилдоо хүрч чаджээ.

Эверестийн оргилд Монголын уулчид ийнхүү 20 жилийн хугацаанд амжилттай авирч буй бөгөөд хамгийн анх 2005 онд гавьяат тамирчин Г.Өсөхбаяр дэлхийн дээвэрт гарч байсан бол анхны эмэгтэй уулчин нь 2011 онд оргилд хүрсэн гавьяат тамирчин Б.Гангаамаа юм.

Өмнө нь Эверестийн оргилд амжилттай хүрсэн монгол уулчдын нэрс:

• Г.Өсөхбаяр (2005)

• Б.Гангаамаа (2011)

• С.Бат-Эрдэнэ, Л.Баярсайхан, Б.Цэвээндаш, Ц.Цогзолмаа (2012)

• Ж.Бямбасүрэн (2018)

• Б.Гантулга (2022)

• О.Золбоохүү, С.Ганхүү, Ц.Гэрэлт-Од, Ц.Анхбаяр (2023)

Харин Л.Пүрэвсүрэн, Ц.Өсөхжаргал нар 2024 онд оргилд хүрсэн ч харамсалтай нь буух замдаа амь насаа алдсан билээ.

Монголчууд Эверестийн оргилд анх хөл тавьснаас хойш 20 жил өнгөрч буй энэ үед А.Баттогтох, Б.Батхишиг нарын амжилт нь уулын спортын шинэ үеийн төлөөлөл хүч түрэн гарч ирж буйг харуулж байна.

Эх сурвалж: Биеийн тамир, спортын хороо