Халдварт өвчин судлалын үндэсний төв (ХӨСҮТ)-өөс мэдээлснээр 2025 оны тавдугаар сарын 19-ний байдлаар улаанбурхан өвчний лабораториор батлагдсан тохиолдлын тоо 2296-д хүрчээ. Эдгээрээс 371 хүн эмнэлэгт хэвтэн эмчлүүлж байгаа бол 369 хүн гэрээр эмчилгээ хийлгэж байгаа аж. Харин 1556 хүн бүрэн эдгэрсэн бол харамсалтай нь нэг хүн уг өвчний улмаас нас барсан байна.

Өвчний халдварын голомт Ерөнхий боловсролын сургуулиудад бүртгэгдэж байгаа бөгөөд хүүхдүүдийн дунд голлон тархаж буй нь анхаарал татаж байна. Хавьтлын тоо 33 мянга 237-д хүрээд байгаа нь халдварын эрсдэл маш өндөр байгааг илтгэж байгаа юм.

Улаанбурхан нь амьсгалын замаар ханиах, найтаах замаар маш хялбараар халддаг, хүн бүр өвчилж болзошгүй халдварт өвчин боловч хугацаанд нь хийлгэх вакцины тусламжтайгаар бүрэн сэргийлэх боломжтой.

Эмнэлгийн байгууллагууд иргэдийг дархлаажуулалтад идэвхтэй хамрагдахыг уриалж, ялангуяа улаанбурханы эсрэг вакцин хийлгээгүй болон товлолын вакцин алгассан хүүхдүүдийг дархлаажуулалтад заавал хамруулах шаардлагатайг сануулж байна.

Иргэн бүр хариуцлагатай байж, өөрийгөө болон бусдыг халдвараас хамгаалахын тулд дархлаажуулалтад идэвхтэй хамрагдах нь чухал юм.

Эх сурвалж: ХӨСҮТ