Сагсан бөмбөгийн Азийн аваргуудын лигийн Зүүн бүсийн урьдчилсан шатны тэмцээний хэсгийн тоглолтууд өндөрлөж, Монгол Улсаас оролцсон “Хасын Хүлэгүүд” баг 100 хувийн амжилттайгаар хасагдах шатанд шалгарлаа.
“Хасын Хүлэгүүд” баг “В” хэсэгт багтаж, зургаан тоглолт дараалан хожин 12 оноотой хэсгээ тэргүүлсэн байна. Тэд хэсгийн сүүлийн тоглолтоо өчигдөр Улаанбаатар хотод “Хай Тех” багтай хийж, 88:80-аар ялалт байгуулжээ. Үүний үр дүнд баг хасагдах шатанд шалгарч, Индонезийн “Пелита Жаяа” багтай тоглохоор болсон байна.
Харин хагас шигшээ шатны нөгөө тоглолт Тайванийн “Таоюань Пайлотс” болон “Нью Тайпэй Кингс” багуудын хооронд болно. Уг хоёр тоглолт энэ сарын 30, 31-нд Улаанбаатар хотын “М банк арена”-д зохион байгуулагдах бөгөөд хожсон хоёр баг “2025 Basketball Champions League Asia” тэмцээний эрхээ авах юм.
Тэмцээнд оролцсон Монголын өөр нэг баг болох “Бишрэлт Металл” “А” хэсэгт нэг хожил, таван хожигдолтойгоор тэмцээнээ өндөрлүүлжээ.
Эх сурвалж: Монголын сагсан бөмбөгийн холбоо
