Монгол Улсын Шадар сайд С.Амарсайханы тушаалаар байгуулагдсан ажлын хэсэг Замын-Үүд боомт болон Чөлөөт бүсийн худалдааны дэлгүүр, гаалийн лабораторид хяналт шалгалт хийлээ. Энэхүү шалгалтын зорилго нь импортоор орж ирж буй жимс, хүнсний ногоонд агуулагдаж болзошгүй пестицидийн үлдэгдлийг илрүүлж, хүнсний аюулгүй байдлыг хангахад чиглэж байгаа юм.

Шалгалтаар 20 нэр төрлийн жимс, ногооноос дээж авч, гаалийн салбар лабораторид шинжилгээнд хамруулсан байна. Уг лаборатори 2024 оны нэгдүгээр сараас шинэ тоног төхөөрөмжөөр ажиллаж эхэлсэн бөгөөд одоогийн байдлаар 16 төрлийн хүнсний ногоо, жимсэнд пестицидийн шинжилгээ хийж байна. 2023 онд 6,300 дээжийг шинжилж байсан бол энэ тоо 2024 онд 9,000-д хүрч, лабораторийн ачаалал эрс өсжээ. Гэсэн ч лаборатори дөнгөж 13 ажилтантай ажиллаж буй нь хүн хүчний дутагдалд орсныг эрхлэгч нь онцолсон байна.

Шалгалтын явцад Чөлөөт бүсийн зарим дэлгүүрүүд баталгаажаагүй, туршилтад хамрагдаагүй электрон жинг ашиглаж байсан зөрчил илэрсэн байна. Стандарт, хэмжил зүйн газраас энэ нь стандартын шаардлага хангаагүй хэрэглээ гэж үзэн, холбогдох арга хэмжээг хуулийн хүрээнд авах болсноо мэдэгдлээ.

Эх сурвалж: НЗДТГ, Гаалийн ерөнхий газар, Стандарт, хэмжил зүйн газар