Тоглолт наймаалцах, бооцоо тавих, хуурч мэхлэх зэрэгтэй тэмцдэг олон улсын байгууллага болох Британийн “ESIC (Esports Integrity Commission)”-оос Монголын ATOX багийн гишүүдэд сахилгын шийтгэл оноолоо. Тус багийг ESL Pro League Season 20-ийн үеэр “Team Falcons” багийн эсрэг тоглолт наймаалцсан байж болзошгүй үндэслэлээр шалгаж эхэлсэн бөгөөд олон сарын турш үргэлжилсэн мөрдөн шалгах ажиллагааны эцэст нотлох баримтууд бүрдсэн байна.
Шалгалтаар тоглогчид өөрсдийн тоглолт дээр 70 гаруй удаа бооцоо тавьсан үйлдэл илэрсэн бөгөөд зарим тоглогчид гэм буруугаа хүлээн зөвшөөрч, зарим нь мөнгөн урамшуулал авч, зөрчлийг нуун дарагдуулсан байна.
Бүх насаар хориг авсан хүмүүс:
-
Батболдын “dobu” Ган-Эрдэнэ: Тоглолт наймаалцах ажиллагааг удирдан зохион байгуулж, багийнхаа эсрэг бооцоо тавьсан, бусдыг дарамталсан, мөнгө амласан, Хятадын зохион байгуулалттай бүлэглэлтэй хамтарсан гэх үндэслэлээр бүх насаар хориглов.
-
Батбаярын “kabal” Бат-Энх: “dobu”-тай хамтран буудай бооцоо тавих, мэдээллийг дарагдуулах, мөнгө зуучлах үйлдэлд оролцсон.
-
Баасантогтохын “nuka” Ана-Эрдэнэ: Аналистаар ажиллаж байх хугацаандаа 70 гаруй удаа багийн тоглолт дээр бооцоо тавьсан, стратеги болон тактикийн мэдээллийг зориуд буруу өгч ёс зүйгүй үйлдэл гаргасан.
Хугацаатай хориг авсан хүмүүс:
-
Гансүхийн “flyNN” Төгөлдөр – 3 жил: Багийн дасгалжуулагчийн хувиар хяналт тавих ёстой байсан ч зөрчил гаргасан тоглогчдыг мэдсээр байж арга хэмжээ аваагүй.
-
Баяндалайн “MiQ” Тэмүүлэн – 1 жил: Гол оролцогч биш ч мэдээлэл нуугаад мөнгөн урамшуулал авсан.
-
Батжаргалын “AccuracyTG” Отгонлхагва, Эрдэнэбаатарын “Zesta” Мөнхсайхан – тус бүр 8 сар: Зөрчлийг мэдсэн ч санамсаргүй байдлаар мэдээлээгүй.
Цаашид шалгагдаж буй хүмүүс:
-
Нямдоржийн “ANNIHILATION” Түвшинтөгс,
-
Оюунбилэгийн “yAmi” Ялалт,
-
Хятадын “xiaosaGe” (Пен Сүн)
тус бүрийн оролцоог ESIC шалгаж эхлээд байгаа.
Энэхүү дуулиант шийдвэр нь Монголын esports-ийн салбарт урьд өмнө байгаагүй хатуу хориг болж байгаа бөгөөд сахилга, ёс зүйн өндөр шаардлага тавих цаг ирснийг харуулж байна. Шударга тоглолтыг сахин хамгаалах үүрэгтэй олон улсын байгууллагуудын дүгнэлт, шийтгэл нь тоглогчдод ирээдүйн мэргэжлийн карьертаа хариуцлагатай хандах шаардлагыг сануулж буй үйл явдал боллоо.
Эх сурвалж: ESIC, ESL, esports-н албан ёсны мэдээ
