Арабын Нэгдсэн Эмират Улсын Аль-Айн хотод болж буй насанд хүрэгчдийн шатрын Ази тивийн аварга шалгаруулах тэмцээний сүүлийн өрөг өнөөдөр явагдана. Энэ удаагийн тэмцээнд Монгол Улсаас эрэгтэй 5, эмэгтэй 12 тамирчин оролцож байна.

Эрэгтэйчүүдийн ангилалд Ираны их мастер Бэрдияа Дэнишвар 7.0 оноотой ганцаараа тэргүүлж байгаа бол түүний араас 6.0 оноотой дөрвөн шатарчин нэхэж буй. Монголын олон улсын мастер Г.Амартүвшин 5.0 оноогоор шилдэг 30-д багтсан бөгөөд өнөөдөр Энэтхэгийн их мастер Сэтурамантай тоглож, зайлшгүй хожих шаардлагатай өрөгт оролцоно.

Харин эмэгтэйчүүдийн ангилалд ФИДЕ-гийн дэд мастер Б.Мөнгөнзул 7.0 оноогоор ганцаараа тэргүүлж байна. Тэрбээр өчигдөр Энэтхэгийн шатарчин Сэшидраг хожсоноор эхний байрт бичигдэх болсон бөгөөд өнөөдрийн сүүлийн өрөгт олон улсын мастер Агравал Вантикатай хараар тоглохоор оноолт таарсан. Энэ өрөгт тэнцэх эсвэл хожих нь түүнийг Азийн аварга болгох бөгөөд Дэлхийн шатрын цомын эрхийг давхар олгоно.

Мөн манай улсын их мастер Б.Мөнгөнтуул өчигдөр Ираны Мэлика Мохаммадийг хожиж 5.5 оноотой 10 дугаар байрт дэвшээд байна. Тэр өнөөдөр Казахстаны их мастер Балабаева Ксениатай сүүлийн өргөө хийнэ.

Тэмцээний эрэгтэй ангиллын эхний 10 байрт шалгарсан шатарчид, эмэгтэй ангиллын алт, мөнгөн медальтнууд Дэлхийн шатрын цомын эрхээ авах тул өнөөдрийн тоглолтууд хамгийн шийдвэрлэх өргүүд болж байна.

Эх сурвалж: Азийн шатрын холбоо, Монголын шатрын холбоо