Ардын хувьсгалын 104 жилийн ойн Үндэсний их баяр наадам болоход хоёр сар хүрэхгүй хугацаа үлдээд байна. Наадмын гол төрлүүдийн нэг болох үндэсний бөхийн барилдаанд тав давж, улсын начин цол хүртсэн хамгийн залуу бөхөд хурдан удмын даага бэлэглэх уламжлал Монголын залуучуудын холбооны зүгээс сүүлийн жилүүдэд тогтсон билээ.

Тэгвэл энэ жилийн наадмаар начны босго алхсан хамгийн залуу бөх зөвхөн даагаар зогсохгүй, “Ямаха” брэндийн мотоцикль унах эрхтэй болох нь. Энэ тухай Хөвсгөл аймгийн Шинэ-Идэр сумын харьяат, улсын арслан Х.Мөнхбаатар мэдэгдсэн бөгөөд өнгөрсөн долоо хоногт Монгол бөхийн өргөөнд болсон арслан цолны хүндэтгэлийн барилдааны үеэр энэ мэдээллийг нийтэд хүргэсэн юм.

Мөн энэ жилийн наадмаас эхлэн түрүү бөхөд “Үүрд хадгалах цом” гардуулж байхаар болсон нь онцлогтой. Тусгаар тогтнол, эв нэгдлийн илэрхийлэл болсон үндэсний бөхийн энэ цомыг бүтээх урлаг, дизайн, уран сайхны сонгон шалгаруулалтыг Монголын үндэсний бөхийн холбооноос уран бүтээлчдийн дунд зарлаад байна.

Энэхүү шинэчлэл, шагналын бодлого нь үндэсний бөхийн үнэ цэнэ, урамшууллыг улам бүр товойлгож, шинэ залуу бөхчүүдийг дэмжих чухал алхам болохыг олон нийт онцолж байна.

Эх сурвалж: Монголын үндэсний бөхийн холбоо, Монгол бөхийн өргөө