Монголын улаан загалмай нийгэмлэг болон БНХАУ-ын ӨМӨЗО-ны Улаан загалмай байгууллагын хамтын ажиллагааны хүрээнд “Бүс ба зам” төслийг 2017 оноос хойш амжилттай хэрэгжүүлж, Монгол Улсын зорилтот бүлгийн иргэдийн амьжиргаа, эрүүл мэндийг дэмжихэд тодорхой хувь нэмэр оруулсаар байна. Төслийн хүрээнд жил бүр нүд судлалын эмч нарыг БНХАУ-д мэргэжил дээшлүүлэх сургалтад хамруулдаг уламжлал тогтжээ.

Энэ жил Улсын хоёрдугаар төв эмнэлэг, Төмөр замын Нэгдсэн эмнэлэг, Солонго, Сөүл, Ихэр талст, Гэрэл зэрэг хувийн эмнэлэг болон Дорноговь, Орхон, Сүхбаатар, Ховд аймгийн Нэгдсэн эмнэлгийн нийт арван эмч Хөх хотын Чаожү нүдний эмнэлэг болон Вэньжоү хотын Анагаах ухааны их сургуульд нэг сарын хугацаанд суралцаж, амжилттай төгслөө.

Сургалтын хаалтын ажиллагаанд БНХАУ-ын Улаан загалмай байгууллагын Гадаад харилцааны дэд дарга Сун И болон Монголын улаан загалмай нийгэмлэгийн Ерөнхий нарийн бичгийн даргын орлогч Т.Баярчимэг нар оролцож, эмч нарт баяр хүргэн, цаашдын хамтын ажиллагаагаа улам өргөжүүлэх талаар санал солилцжээ.

Энэхүү сургалт нь нүд судлалын чиглэлээр эмч нарын мэдлэг, ур чадварыг ахиулах, орчин үеийн оношилгоо, эмчилгээний арга барилыг эзэмшүүлэхэд чиглэгдэж буйгаараа онцлог юм.

Эх сурвалж: Монголын улаан загалмай нийгэмлэг