Бразилын хөл бөмбөгийн холбооноос мэдээлснээр Италийн алдарт дасгалжуулагч Карло Анчелотти тус улсын шигшээ багийн ахлах дасгалжуулагчаар ажиллахаар боллоо. Түүний гэрээ 2026 оны Дэлхийн аварга шалгаруулах тэмцээн хүртэл хүчин төгөлдөр байх юм.

Анчелотти нь Бразилын шигшээ багийг удирдах хоёр дахь гадаад дасгалжуулагч болж байна. Өмнө нь, 1965 онд Аргентины иргэн Фильпо Нуньес тус багийн дасгалжуулагчаар ажиллаж байсан түүхтэй.

Бразилын хөл бөмбөгийн холбооны ерөнхийлөгч Эднальдо Родригес энэ шийдвэрийг “стратегийн томоохон алхам” хэмээн онцолж, “Бид дэлхийд тэргүүлэх зорилтоо ийнхүү албан ёсоор тунхаглалаа. Анчелотти бол хөл бөмбөгийн түүхэн дэх аугаа их дасгалжуулагч бөгөөд Бразилын хөл бөмбөгийн алдар нэрийг дахин мандуулах шинэ хуудсыг нээх болно” гэж мэдэгдсэн байна.

Одоогоор Анчелотти Испанийн “Реал Мадрид” багийг удирдаж байгаа бөгөөд энэ сарын 25-нд болох сүүлчийн тоглолтын дараа албан ёсоор ажлаа хүлээлгэн өгнө.

Карло Анчелоттигийн амжилтын товчоон:

• Европын таван улсын аваргын цомыг хүртсэн түүхэн дэх анхны дасгалжуулагч

• Аваргуудын лигийн тэмцээнд багаа 5 удаа түрүүлүүлсэн дээд амжилтын эзэн

• Испанийн “Реал Мадрид”-ыг олон удаа аваргалахад голлох үүрэг гүйцэтгэсэн

• Английн “Челси”, Германы “Бавариа”, Италийн “Милан”, Францын ПСЖ багуудыг улсын аваргад хүргэсэн

• 2022 онд УЕФА-гийн шилдэг дасгалжуулагч, 2024 онд ФИФА-гийн шилдэг дасгалжуулагчаар шалгарсан

Карло Анчелоттигийн нэрийг Италийн хөл бөмбөгийн алдрын танхим болон “Милан”, “Рома” багуудын алдрын танхимд мөнхөлсөн бөгөөд тэрбээр Бразилын шигшээ багтай шинэ амжилтын түүхийг бичихээр зорьж байна.

Эх сурвалж: ТАСС