Казахстаны Астана хотноо болсон жүдо бөхийн “Их дуулга” тэмцээнд 44 орны 350 гаруй жүдоч хүч сорьж, өрсөлдөөн өндөр байсан ч Монголын багийн тамирчид амжилттай оролцож, гурван хүрэл медаль хүртэн эх орондоо ирж байна.

Тэмцээний эхний өдөр эрэгтэйчүүдийн 66 кг-ын жинд олон улсын хэмжээний мастер Ө.Жанцандорж Марокко, Киргиз, Казахстаны бөхчүүдийг дараалан ялж, хагас шигшээд шалгарсан ч ОХУ-ын Рамазан Абдулаевт дийлдсэн юм. Хүрэл медалийн төлөө Болгарын бөх Боян Ётовыг ялж, “Их дуулга”-аас анхны медалиа хүртлээ.

Харин тэмцээний хоёр дахь өдөр эмэгтэйчүүдийн 63 кг-ын жинд гавьяат тамирчин Л.Энхрийлэн хүрэл медаль хүртэж, "Лос-Анжелес-2028" олимпын циклд шинэ жиндээ “Их дуулга”-ын анхны, олон улсын тэмцээнээс хоёр дахь медалиа зүүв. Тэрбээр өмнө нь Азийн аварга шалгаруулах тэмцээнээс мөнгөн медаль хүртсэн бөгөөд “Их дуулга” тэмцээнээс нийт зургаан медальтай болоод байна.

Эрэгтэйчүүдийн 73 кг-д дэлхийн аваргын хүрэл медальт Л.Анхзаяа Унгар, Итали, мөн нутаг нэгт Б.Эрдэнэбаярыг ялж, хагас шигшээд шалгарсан ч дэлхийн аварга Нилс Штамптай тулж ялагдсан юм. Улмаар хүрэл медалийн төлөө Узбекистаны бөхийг ялж, төрийн далбаагаа мандуулах эрхтэй болжээ.

Монголын жүдочид энэ удаагийн “Их дуулга”-аас гурван хүрэл медаль, гурван шагналт байр эзэлж, 44 орноос багийн дүнгээр 13 дугаарт эрэмбэлэгдэв.

Эх сурвалж: Монголын жүдо бөхийн холбоо