Эрүүл мэндийн салбарын бодлого нь алслагдсан аймаг, орон нутгийн иргэдэд чанартай тусламж үйлчилгээг цаг алдалгүй, тухайн бүс нутагт нь авах нөхцөлийг бүрдүүлэхэд чиглэж байна. Энэ хүрээнд яаралтай тусламжийн анхан шатны тусламжийг цаг алдалгүй үзүүлэх чадварлаг мэргэжилтнийг орон нутагт бэлтгэх шаардлага ихэсч байгаа юм.

Орон нутгийн болон гуравдугаар шатлалын эмнэлгүүдийн яаралтай тусламжийн тасгийн сувилагч мэргэжилтнүүд туршлага солилцох, мэдлэг, ур чадвараа дээшлүүлэх зорилгоор ур чадварын тэмцээнд оролцлоо. Энэхүү тэмцээн нь өрсөлдөөн гэхээс илүү бусдаас суралцах, хамтдаа хөгжих, яаралтай тусламжийн сувилахуйн тусламжийг улам боловсронгуй болгох зорилготой байв.

Яаралтай тусламжийн тасагт ажиллаж буй сувилагч нар хамгийн хүнд, шуурхай тусламж үзүүлэх шаардлагатай нөхцөлд ажилладаг бөгөөд богино хугацаанд оновчтой шийдвэр гаргаж, хүний амь насыг аврах чухал үүргийг хүлээдэг. Тиймээс тэдний мэдлэг чадварыг тогтмол дээшлүүлэх нь эрүүл мэндийн салбарын тэргүүлэх зорилтуудын нэг болж байна.

Улсын гуравдугаар төв эмнэлэгт жилд 23 мянга гаруй иргэн эрүүл мэндийн тусламж үйлчилгээ авдаг бөгөөд ирж байгаа иргэдийн тал орчим хувь нь хөдөө орон нутгийн иргэд байдаг. Энэ их ачааллыг бууруулах, орон нутгийн иргэдийг заавал нийслэлд зорчихгүйгээр өөрийн бүс нутагтаа чанартай, шуурхай тусламж авч чаддаг болгох нь тус салбарын тулгамдсан асуудлын нэг болоод байна.

Ур чадвартай сувилагч мэргэжилтнийг бэлтгэх нь цаг хугацаа, тасралтгүй сургалт шаарддаг ч шат дараатайгаар мэдлэг, ур чадварыг нь нэмэгдүүлэх сургалтуудыг зохион байгуулж байна. Ур чадварын энэ удаагийн тэмцээнийг цаашид жил бүр уламжлал болгон зохион байгуулахаар төлөвлөж, сувилагч мэргэжилтнүүдийн багаар ажиллах хандлагыг төлөвшүүлэх, амь нас хөнгөн буй үед тусламжийг цаг алдалгүй үзүүлэх ур чадварыг эзэмшүүлэхийг зорьж байна.

Эх сурвалж: Эрүүл мэндийн яам