Дэлхийн хамгийн өндөр цэг болох Эверест ууланд олон улсын хэмжээний мастер А.Баттогтох, Б.Батхишиг нар амжилттай авирах зорилгоор бэлтгэлээ базааж байна. Тэд Эверестийн өмнөд хөтөлийн зам буюу Балба талаас авиралт хийж байгаа бөгөөд өндрийн кемпүүдийг байгуулж, олс тавих ажлуудыг гүйцэтгэж байна.
Монголын уулчид дундаас анх 20 жилийн өмнө гавьяат тамирчин Г.Өсөхбаяр Эверестийн оргилд хөл тавьсан бол 2011 онд Б.Гангаамаа тус оргилд авирсан анхны эмэгтэй уулчин болж түүхэнд бичигджээ. Үүнээс хойш нийт 12 монгол уулчин Эверестийн оргилд гарсан ч харамсалтай нь хоёр нь буух замдаа амь эрсэдсэн байдаг. Хэрэв А.Баттогтох, Б.Батхишиг нар энэ удаагийн авиралтаа амжилттай дуусгаж чадвал Монголын 15, 16 дахь уулчид болон түүхэнд нэрээ мөнхлөх юм.
Энэ үеэр олон улсын хэмжээний мастер Ч.Ариунзул дэлхийн тав дахь ноён оргил болох 8485 метр өндөр Макалу ууланд авирч байгаа бол өмнө нь тэрээр 8586 метрийн өндөртэй Канченжунга ууланд амжилттай авирч байжээ. Харин дэд мастер Ж.Ганбаяр Пакистан улсад орших дэлхийн ес дэх ноён оргил Нанга Парбат ууланд авирахаар бэлтгэл хангаж байна.
Дэлхийд 8000 метрээс дээш өндөртэй 14 ноён оргил байдгаас Монголын уулчид есөн оргилд нь амжилттай хөл тавьсан бөгөөд энэ удаагийн авиралтууд амжилттай болвол тэдний амжилтын тоо нэмэгдэх боломжтой байна.
Эх сурвалж: Монголын уулчдын холбоо
