Европын хөлбөмбөгийн холбооны Европын лигийн хагас шигшээ тоглолтын хариу тоглолтууд өчигдөр болж, Английн “Тоттенхэм” болон “Манчестер Юнайтед” багууд финалд шалгарлаа.
“Тоттенхэм” баг Норвегийн “Будё-Глимт” багийн талбайд зочлон 2:0-ээр ялж, эхний тоглолтод 3:1-ээр хожсон тул хоёр тоглолтын нийлбэр дүнгээр итгэл төгс финалд шалгарсан байна.
Мөн “Манчестер Юнайтед” баг өөрийн талбайд Испанийн “Атлетик”-ийг 4:1-ийн харьцаатай бут ниргэсэн бөгөөд эхний тоглолтод 3:0-ээр ялалт байгуулсан тул нийлбэр дүнгээр финалын эрхээ авлаа.
Эрэмбээрээ Европын клубуудын хоёрдугаар зэрэглэлийн энэ тэмцээнд “Тоттенхэм” баг дөрөв дэх удаагаа финалд шалгарч байна. Тус баг өмнө нь 1972, 1984 онуудад УЕФА-гийн цомыг (одоогийн Европын лиг) хүртэж байсан бол 1974 онд мөн финалд тоглож байжээ. Харин “Манчестер Юнайтед” баг 2017 онд Европын лигийн аварга болж, 2021 онд финалд оролцож байв.
Тэмцээний финалын тоглолт тавдугаар сарын 21-нд Испанийн Бильбао хотод болох бөгөөд Английн баг түрүүлэх нь тодорхой болсон тул тус улсын 6 баг дараагийн улиралд Аваргуудын лигт оролцох эрх авах нь баталгаажжээ.
Европын лигийн сүүлийн аваргаар Италийн “Аталанта” баг тодорч байсан юм.
Эх сурвалж: ТАСС
