Шагайн харваа нь Монголын ард түмний эртний уламжлалт наадгай бөгөөд 2014 онд ЮНЕСКО-ийн “Хүн төрөлхтний соёлын биет бус өв”-ийн жагсаалтад Монгол Улсын нэрийн өмнөөс бүртгэгдсэн соёлын өв юм. Энэ түүхэн ажлыг санаачлан хэрэгжүүлсэн хүн бол Монголын шагайн нумт харвааны холбооны дэд тэргүүн, “Даяндай мээрэн” клубийн үүсгэн байгуулагч Цогтбаярын Ганбат юм.
Шагайн харваа нь 160 орчим төрлийн уламжлалт наадгай дотроос хамгийн эрчимтэй хөгжиж буй нь болж чадсан бөгөөд өнөөдөр мянга мянган хүн нэгэн дор цуглан харвааны наадам хийж, соёлыг уламжлуулан авч яваа нь түүхэн үргэлжлэл болж байна. Урт хугацааны дарамт шахалтыг даван туулахын сацуу уламжлалаа тасалдуулахгүй хадгалж ирсэн энэхүү соёлын өвийг дэлхий дахинд түгээн дэлгэрүүлж буй “Даяндай мээрэн” клубийн үйл ажиллагаа олон нийтээс өндөр үнэлгээ хүлээж байна.
Клубийн гол зорилго нь 5-12 насны өсвөр үеийн харваачдаас эхлэн бүх насны хүмүүсийг шагайн харваанд сургаж, үндэсний наадгайгаа үе дамжуулан хөгжүүлэхэд оршиж байгаа юм. Хойд Америк зэрэг дэлхийн олон улс оронд суугаа монголчууд, харвааны сонирхогчид ч мөн энэ клубийн үйл ажиллагааг дэмжиж, соёлоо хадгалах, түгээх үйлсэд сэтгэл, зүрхээрээ оролцож байгаа нь онцлогтой.
Монголчуудын цусанд шингэсэн өв соёлын нэгээхэн хэсэг болох шагайн харвааг өртөөлөн авч яваа энэ клуб, түүний ард ажиллаж буй Ганбат тэргүүтэй баг хамт олонд шагайн харваачдын зүгээс талархал илэрхийлж байна.
Эх сурвалж: Монголын шагайн нумт харвааны холбоо
