Европын хөлбөмбөгийн Конференцийн лигийн 2024/2025 оны улирлын финалын тоглолтод Английн “Челси”, Испанийн “Бетис” багууд шалгарч үлдлээ. Энэ нь хоёр багийн хувьд тус тэмцээний финалд анх удаа шалгарч буй тохиолдол юм.
Өчигдөр болсон хариу тоглолтод “Челси” баг Шведийн “Юргорден”-ыг өөрийн талбай дээр 1:0 харьцаатайгаар хожсон бол эхний тоглолтод 4:1-ээр илүүрхэж байсан тул нийлбэр дүнгээр 5:1 болж финалд шалгарсан байна.
Харин “Бетис” ба “Фиорентина” багуудын хариу тоглолт илүү өрсөлдөөнтэй болж өнгөрлөө. “Бетис”-ийн Антони 30 дахь минутад гоол оруулж тооны харьцааг нээсэн ч “Фиорентина”-гийн Робин Госенс 34 ба 42 дахь минутад дараалан гоолдож дубль хийснээр үндсэн цаг 2:1-ээр өндөрлөсөн. Эхний тоглолтод мөн 2:1-ээр “Бетис” ялсан байсан тул нийт дүнгээр тэнцэж, сунгац тоглолт явагдсан. Сунгацын 97 дахь минутанд Антонигийн дамжуулсан бөмбөгийг Абде Эззалзули оновчтой цохиж, тоглолтыг 2:2 болгосноор нийт дүнгээр 4:3 болж “Бетис” баг финалын эрхээ авлаа.
“Челси” өмнө нь 2012, 2021 онд Аваргуудын лиг, 2013, 2019 онд Европын лигт түрүүлж байсан түүхтэй бол “Бетис” Европын дээд түвшний тэмцээний финалд анх удаа шалгарч байгаа нь онцлог үйл явдал боллоо.
Конференцийн лигийн финалын тоглолт тавдугаар сарын 28-нд Польшийн Вроцлав хотноо зохиогдоно. Энэ тэмцээн нь UEFA-гаас зохион байгуулдаг гурав дахь түвшний клубуудын цом бөгөөд 2021 оноос эхлэн явагдаж байгаа юм. Өнгөрсөн улиралд Грекийн “Олимпиакос” баг аваргаар тодорч байв.
Эх сурвалж: ТАСС
