Монголын үндэсний бөхийн холбооны тавдугаар сард зохион байгуулж буй дөрөв дэх барилдаан энэ сарын 10-нд болно. Тус барилдаан нь Увс аймгийн Сагил сумын түүхт 100 жилийн ойг тохиолдуулан, тус сумаас төрөн гарсан улсын начин Б.Насандэлгэрийн нэрэмжит улс, аймаг, цэргийн алдар цолтой хүчит 128 бөхийн барилдаан юм.
Барилдаанд зодоглох бөхчүүдийн бүртгэл өнөөдөр албан ёсоор эхэлсэн бөгөөд барилдааны үеэр үзэгчдээс азтан тодруулж, Тоёота Приус-41 маркийн автомашинаар урамшуулах аж. Энэ нь бөхийн уралдааныг сонирхогч түмэнд зориулсан онцгой урамшуулал болж байна.
Барилдааны нэрэмжит болсон улсын начин Баяртогтохын Насандэлгэр нь 1998 онд 20 насандаа сумын заан болж, дараа нь 2003 онд Хөвсгөлийн наадамд тав даван аймгийн начин цол хүртжээ. Харин 2005 онд Ардын хувьсгалын 84 жилийн ойн баяр наадмаар улсын аварга О.Балжиннямаар дөрөв, улсын заан О.Одгэрэлээр тав даван улсын начин цолны босгыг давсан байна. Монгол бөхийн өргөөнд зохион байгуулсан барилдаанд түрүүлж байгаагүй ч нийслэлийн МАН-ын 85 жилийн ойд улсын заан М.Өсөхбаяраар тав давж шөвгөрсөн нь түүний хамгийн өндөр амжилтад тооцогддог.
Мөн энэ үеэр Монголын үндэсний бөхийн холбооноос энэ сарын 25-нд зохион байгуулахаар төлөвлөж байсан “Монгол сугалаа” компанийн нэрэмжит 128 бөхийн барилдааныг цуцалсан талаар мэдээлэв.
Эх сурвалж: Монголын үндэсний бөхийн холбоо.
