Биеийн тамир, спортын улсын хорооны гурван давхарын ёслол хүндэтгэлийн танхимд өнөөдөр иогийн спортын олон улсын тэмцээнүүдэд амжилттай оролцсон Монголын баг тамирчид хэвлэлийн мэдээлэл хийлээ. Тэд Малайзын Куала Лумпур хотод болсон насанд хүрэгчдийн дэлхийн аварга шалгаруулах тэмцээн, Энэтхэгийн Шинэ Дели хотод болсон өсвөр үеийнхний Ази тивийн аваргад оролцжээ.
Насанд хүрэгчдийн иогийн дэлхийн аварга шалгаруулах тэмцээнд 48 орны баг тамирчид өрсөлдсөнөөс манай улсын тамирчдын хамгийн өндөр амжилт нь тавдугаар байр байсан бол өсвөр үеийн дэлхийн аварга шалгаруулах тэмцээнд дөрөвдүгээр байр эзэлсэн амжилт үзүүлжээ.
Түүнчлэн өсвөр үеийнхний Ази тивийн аварга шалгаруулах тэмцээнээс Монголын тамирчид нэг алт, долоон мөнгө, таван хүрэл медаль хүртсэн байна. Ийнхүү багийн нийлбэр дүнгээр хоёрдугаар байрт шалгарсан нь тэдний хичээл зүтгэл, ур чадварыг илтгэж байна.
Эдгээр тэмцээнүүдэд амжилттай оролцсон баг тамирчдыг Биеийн тамир, спортын улсын хорооны удирдлагууд хүлээн авч уулзан, Монгол Улсад биеийн тамир, спортын салбар үүсэж хөгжсөний 100 жилийн ойн медалиар шагнасан тухайгаа тус хороо мэдээлэв.
Эх сурвалж: Биеийн тамир, спортын улсын хороо
