Монголын чөлөөт бөхийн эрэгтэй шигшээ багийн тамирчид түүхэндээ анх удаа бүрэн бүрэлдэхүүнээрээ ОХУ-ын Дагестанд хамтарсан бэлтгэл хийж байна. Энэхүү хамтарсан бэлтгэл нь 2025 оны дөрөвдүгээр сарын 28-нд эхэлсэн бөгөөд нийт 21 хоног үргэлжлэх юм. Бэлтгэлийн төгсгөлд дэлхийн таван удаагийн аварга, Дагестаны домогт бөх Али Алиевийн нэрэмжит олон улсын тэмцээнд оролцохоор төлөвлөж байна.
Энэхүү хамтын ажиллагаа нь Монголын чөлөөт бөхийн холбооны ерөнхийлөгч Я.Содбаатар, ОХУ-ын бөхийн холбооны ерөнхийлөгч М.Мамиашвили нарын хоорондын шууд харилцаа, зохион байгуулалтын үр дүнд хэрэгжиж байгаа билээ. Мөн холбооны дэд ерөнхийлөгч, гавьяат тамирчин Б.Болд, Дагестаны шигшээ багийн дасгалжуулагчтай хийсэн хэлэлцээний хүрээнд уг бэлтгэл бодитоор хэрэгжиж, Монголын бөхчүүд Дагестаны шигшээ багтай ижил нөхцөлд, өндөр төвшний бэлтгэл хийх боломжтой болжээ.
Бэлтгэлийн дараа Монголын шигшээ багийн тамирчид 5 дугаар сарын 21-нд эх орондоо ирж, 5 дугаар сарын 29-нөөс 6 дугаар сарын 1-ний хооронд Буянт-Ухаа спортын ордонд зохион байгуулагдах чансааны оноо олгох олон улсын тэмцээнд оролцоно. Энэхүү тэмцээн нь тэдний олон улсын чансаанд чухал нөлөө үзүүлэх ач холбогдолтой бөгөөд Дагестаны бэлтгэлийн үр дүнг шууд сорих сорилт болох юм.
Эх сурвалж: Монголын чөлөөт бөхийн холбоо
