Уламжлалт анагаах ухааны тусламж, үйлчилгээний чанар, хүртээмжийг сайжруулах, нийгмийн эрэлт хэрэгцээнд нийцсэн, нотолгоонд суурилсан шинэ шатны хөгжлийг хангах зорилгоор бодлого, хууль эрх зүйн шинэчлэл хийх хэлэлцүүлэг зохион байгуулагдлаа.
Хэлэлцүүлэгт уламжлалт анагаах ухааны эмч, мэргэжилтнүүд, салбарын судлаачид болон холбогдох байгууллагын төлөөллөөс бүрдсэн 100 гаруй оролцогч биечлэн оролцсон бол 21 аймгийн уламжлалт анагаах ухааны тусламж, үйлчилгээ үзүүлдэг байгууллагууд цахимаар холбогдон саналаа өгчээ.
Хэлэлцүүлгийн үеэр оролцогчид уламжлалт анагаах ухааны өнөөгийн нөхцөл байдал, тулгамдаж буй асуудлуудыг хөндөн хэлэлцэж, нотолгоонд суурилсан хөгжлийн шинэ шатанд уялдах эрх зүйн зохицуулалтын өөрчлөлтийн тухай санал бодлоо илэрхийлсэн байна.
Хөтөлбөр нь орчин үеийн анагаах ухаантай уялдаатай, шинжлэх ухаанч үндэслэлтэй бодлогын шинэчлэлийг чиглэл болгон баримталж байгаагаараа онцлог бөгөөд хэлэлцүүлгээс гарсан зөвлөмж, дүгнэлтийг цаашдын хууль, бодлогын төсөлд тусгахаар зорьж байна.
Эх сурвалж: Эрүүл мэндийн яам
