Хятадын снукер биллиардын тамирчин Жао Синьтун Уэльсийн домогт тоглогч Марк Уильямсыг 18-12 гэсэн харьцаатай буулган авч, снукерийн дэлхийн аварга шалгаруулах тэмцээний түрүүг хүртсэн анхны ази тамирчин болж түүхэн амжилт үзүүллээ.

Даваа гарагийн сүүлийн тоглолтоор ялалтаа баталгаажуулсан Жао сэтгэгдэлдээ “Түрүүлсэндээ итгэж чадахгүй байна. Зүүд шиг л байна” хэмээн онцлон тэмдэглэжээ. Тэрбээр бооцоотой холбоотой журмыг зөрчсөн шалтгаанаар 20 сарын турш эрхээ хасуулж, өнгөрсөн есдүгээр сард мэргэжлийн спортдоо буцан ирсэн юм. Сонирхогчийн статустайгаар дөрвөн тэмцээнд дараалан түрүүлснээр ДАШТ-д оролцох эрхээ авсан нь энэ юм.

Хоёр өдөр үргэлжилсэн аваргын тулаанд Жао ням гаргийн эхний хоёр тоглолтод 11-6-гаар давамгайлсан бол, даваа гаргийн гурав дахь тоглолтын дараа 17-8 гэсэн онооны зөрүүгээр илүүрхсэн байна. Түүний өрсөлдөгч, 50 настай гурван удаагийн дэлхийн аварга Марк Уильямс тоглолтын дараа “Ямар хүчтэй өрсөлдөгч вэ? Түүний тоглолтыг бишрэхээс аргагүй” хэмээн үнэлжээ.

Жао Синьтун шинэ улирлыг дэлхийн чансааны 11 дүгээр байраар эхлэх бөгөөд одоогийн байдлаар дэлхийн шилдэг 32 тоглогчийн дотор есөн хятад тамирчин багтаж байгаа нь Хятадын снукерийн спорт хурдацтай хөгжиж байгаагийн тод жишээ юм.

Өмнө нь Дин Жуньхуй 2016 оны дэлхийн аваргын финалд шалгарсан анхны ази хүн болж байсан ч Английн Марк Селбид ялагдсан юм.

Эх сурвалж: Xinhua