Засгийн газрын 2024–2028 оны үйл ажиллагааны хөтөлбөрийн хүрээнд, хүүхдийн эрүүл мэндийг хамгаалах, өвчнөөс урьдчилан сэргийлэх зорилгоор Ерөнхий боловсролын сургуулийн нэгдүгээр ангийн сурагчдын дунд нүд, шүд, зүрхний эмгэгийн эрт илрүүлэг үзлэгийг зохион байгуулж эхэллээ.
Эрүүл мэндийн сайд, Боловсролын сайдын хамтарсан А/413, А/151 дүгээр тушаалаар батлагдсан энэхүү арга хэмжээг улс орон даяар үе шаттайгаар хэрэгжүүлж байгаа бөгөөд Говь-Алтай аймагт дөрөвдүгээр сарын 1-нээс эхлүүлжээ. Аймгийн хэмжээнд шүдний урьдчилан сэргийлэх үзлэгийг 7 сум, 1 тосгоны эрүүл мэндийн төвүүд гэрээт хувийн шүдний эмнэлэгтэй хамтран зохион байгуулж, хамрагдах 250 хүүхдийн 83.6 хувьд нь үзлэг хийсэн талаар аймгийн ЭМГ мэдээлсэн байна.
Мөн нүдний үзлэгийн хувьд сургуулийн эмч, багш, нийгмийн ажилтнуудыг чадавхжуулах хоёр өдрийн сургалтыг өнөөдрөөс эхлүүлж, аймгийн төвийн сургуулиудад нүдний илрүүлэг үзлэгийг хэрэгжүүлж эхэлсэн байна.
Хөтөлбөрийн хүрээнд зүрхний эмгэгийн эрт илрүүлгийг ч мөн хийхээр төлөвлөсөн бөгөөд үүгээр дамжуулан хүүхдийн эрүүл мэндийг хамгаалах, ирээдүйн насанд хүрэгчдийн өвчлөлийг бууруулах чухал алхам болж байна.
