Төв аймгийн Явган алхалтын холбооны удирдах зөвлөлийн гишүүн, ахмад алхагч Б.Тойвгоо 2025 оны тавдугаар сарын 5-ны өдөр буюу өөрийн 65 насны төрсөн өдрөөрөө Зуунмод хотын Мөнх алдрын талбайгаас Баян-Өлгий аймаг хүртэл 2000 км зам туулах явган алхалтаа албан ёсоор эхлүүллээ.
Тэрбээр энэ удаагийн урт замын алхалтаараа нийгэмд эрүүл мэнд, байгаль орчин, эх оронч үзлийг дэмжих, олон нийтэд зөв үлгэр дуурайл үзүүлэх зорилготой байгаагаа онцлон тэмдэглэв. “Нийгэмдээ эх оронч сэтгэлгээ, эрүүл амьдралын хэв маяг, байгаль дэлхийгээ хайрлах үзлийг өөрийн биеэрээ үлгэрлэх зорилготой байна” хэмээн замд гарахын өмнө сэтгэгдлээ хуваалцжээ.
Түүний энэхүү алхалтыг гэр бүлийнхэн болон Төв аймгийн Явган алхалтын холбооны гишүүд дэмжиж, хамт замд үдэн гаргасан юм. Уг алхалтад биеийн бэлэн байдал, тэсвэр хатуужил шаардлагатай бөгөөд өндөр насандаа ийнхүү холын замд гарах нь олон хүний анхаарлыг татаж байна.
Төв аймгийн Явган алхалтын холбоо нь сүүлийн нэг жилийн хугацаанд тогтмол үйл ажиллагаа явуулж байгаа бөгөөд өглөө бүр 06:00 цагаас явган алхах сонирхолтой иргэдийг нээлттэйгээр уриалан оролцуулдаг болсон байна.
Эх сурвалж: Төв аймгийн ЗДТГ, Явган алхалтын холбоо
