Ховд аймгийн Чандмань сумын түүхт 100 жилийн ойд зориулсан, Монгол Улсын начин И.Мөнхбаатарын нэрэмжит “Хан Жаргалант хайрханы хишиг” барилдаан бөхийн өргөөнд амжилттай болж өндөрлөлөө.

Энэхүү барилдаанд:

• Ховд аймгийн Зэрэг сумын харьяат, “Аврагч” спорт хороо, “Ховд” дэвжээний бөх, улсын заан Б.Бат-Өлзий түрүүлж,

• Баянхонгор аймгийн Жинст сумын харьяат, “Алдар” спорт хороо, “Тэргүүн Богд” дэвжээний бөх, улсын начин Э.Батмагнай үзүүрлэлээ.

Б.Бат-Өлзий энэ улирлын хоёр дахь, нийт 31 дэх түрүүгээ авсан бол Э.Батмагнай тав дахь удаагаа үзүүрлэж, энэ удаа хоёр өдөр дараалан шөвгөрснөөр онцлог байлаа. Түрүү бөх суудлын автомашин, үзэгчдээс нэг сая төгрөгийн найман азтан, суудлын автомашины нэг азтан тодорсон юм.

Б.Бат-Өлзий барилдааны дараа:

“Залуу начинтай хоёр өдөр дараалж хүч шавхан барилдлаа. Өчигдөр унасан бол өнөөдөр даагаа нэхлээ. Би энэ сард бүх барилдаандаа оролцох төлөвлөгөөтэй байгаа. Чандмань сумынхаа 100 жил, И.Мөнхбаатар ахынхаа нэрэмжит барилдаанд түрүүлсэндээ баяртай байна” хэмээн сэтгэгдлээ хуваалцсан байна.

Их шөвөгт шалгарсан бөхчүүд:

• Улсын арслан Э.Оюунболд (Хэнтий, Өмнөдэлгэр)

• Улсын үнэн зоригт харцага Б.Зоригтбаатар (Архангай, Батцэнгэл)

  • Тэрбээр допингийн шийтгэлээс хойш хоёр жилийн дараа дэвжээнд эргэн ирж, дөрвөн барилдаанд оролцохдоо хоёр удаа их шөвөгт үлдээд байна.

  • Өмнө нь найм түрүүлж, ес үзүүрлэн, энэ удаагийнхтай хамт 15 дахь шөвгөө авлаа.

Наймд шалгарсан бөхчүүд:

• Улсын харцага Г.Бадрах

• Улсын начин Б.Чимэдвандан, Б.Даваа-Очир

• Аймгийн хурц арслан Н.Амгаланбаатар

Түүхт ойд зориулсан энэхүү барилдаан нь нутаг нутгийн шилдэг бөхчүүдийг нэг дор цуглуулж, үзэгч олны талархлыг хүлээсэн чансаатай, өрсөлдөөнтэй барилдаан болж өнгөрлөө.

Эх сурвалж: МҮБХ