Сэлэнгэ аймгийн Ерөө сумын “А” зэрэглэлийн анхан шатны эрүүл мэндийн төвийг түшиглэн бүс нутгийн иргэдэд нарийн мэргэжлийн тусламж үйлчилгээ үзүүлэх загвар тогтолцоог бий болгохоор шийдвэрлэлээ. Энэ нь шаардлагатай тусламж, үйлчилгээг цаг алдалгүй, шуурхай, хүртээмжтэй хүргэх шинэ боломж нээж буй алхам болж байна.
Монгол Улсын Засгийн газраас баримталж буй төвлөрлийг сааруулж, бүсчилсэн хөгжлийг дэмжих бодлогын хүрээнд, дээрх чиглэлээр гурван талт уулзалт, ярилцлага зохион байгуулжээ. Уулзалтыг аймгийн Эрүүл мэндийн газраас санаачлан зохион байгуулсан бөгөөд дараах төлөөллүүд оролцсон байна:
-
Ерөө сумаас аймгийн ИТХ-д сонгогдсон төлөөлөгч Х.Батцэнгэл
-
Аймгийн ЭМГ-ын дарга Ж.Од
-
Ерөө сумын Засаг дарга Э.Одгарав
-
Сумын ЭМТ-ийн дарга Д.Золжаргал
-
Аймгийн ЭМГ-ын Эмнэлгийн тусламж үйлчилгээний хэлтсийн мэргэжилтнүүд
Хэлэлцүүлгийн үеэр Засгийн газрын бүсчилсэн бодлогыг эрүүл мэндийн салбарт хэрхэн хэрэгжүүлэх, иргэдэд илүү хүртээмжтэй болгох арга зам, бодит ажил хэрэг болгох шийдлүүд дээр санал нэгдэж, цаашдын хамтын ажиллагааны суурийг тавьжээ.
Ийнхүү Ерөө сум нь бүсийн хэмжээнд эрүүл мэндийн тусламжийн хүртээмжийг нэмэгдүүлэх туршилтын загвар төв болохоор бэлтгэлээ хангаж байна.
Эх сурвалж: Сэлэнгэ аймгийн Эрүүл мэндийн газар
