Эрүүл мэндийн даатгалын ерөнхий газрын дарга С.Энхболд, Шүүхийн шийдвэр гүйцэтгэх ерөнхий газрын Шийдвэр гүйцэтгэх албаны дарга, Ерөнхий шийдвэр гүйцэтгэгч, хурандаа Б.Нямгомбо нар өнөөдөр хамтран ажиллах санамж бичигт гарын үсэг зурлаа.

Энэхүү хамтын ажиллагааны хүрээнд Эрүүл мэндийн даатгалын санд үүссэн өр, авлагыг хуулийн дагуу барагдуулах, мөн шүүхийн шийдвэр гарсан төлбөрийн шаардлагыг шуурхай биелүүлэх чиглэлээр талууд нягт хамтран ажиллах юм.

Санамж бичигт тусгаснаар:

• Аймаг, дүүргийн эрүүл мэндийн даатгалын байгууллагууд шүүхээр эцэслэн шийдвэрлэгдсэн өр, авлагыг шийдвэр гүйцэтгэх байгууллагад тогтмол хүргүүлж,

• Хууль, эрх зүйн хүрээнд шаардагдах мэдээ, мэдээллийг харилцан солилцож,

• Шийдвэр гүйцэтгэлийн ажиллагааг үр дүнтэй, шуурхай явуулах нөхцөлийг бүрдүүлэхээр тохиролцсон байна.

Ийнхүү хоёр байгууллага хамтран ажилласнаар даатгалын сангийн сахилга бат, төлбөрийн биелэлт сайжрах нөхцөл бүрдэх бөгөөд иргэд, байгууллагуудад чиглэсэн үйлчилгээ илүү хариуцлагатай, ил тод болох хүлээлттэй байна.

Эх сурвалж: Эрүүл мэндийн даатгалын ерөнхий газар