Хүний папиллома вирусийн (HPV) халдвараас урьдчилан сэргийлэх вакцинжуулалтыг Монгол Улсад 2024 оны арваннэгдүгээр сараас товлолт дархлаажуулалтад албан ёсоор нэвтрүүлэн эхлүүлсэн. Одоогийн байдлаар 11 настай 70 мянга гаруй хүүхдээс 30 мянга орчим нь буюу нийт хамрагдалт 40 хувьтай явагдаж байна. Энэхүү вакцинд хүүхдүүд харьяалал харгалзахгүйгээр өрхийн болон сумын эрүүл мэндийн төвд хамрагдах боломжтой бөгөөд товлолт хугацаанаас хоцорсон хүүхдүүдийг нөхөн дархлаажуулж байгаа талаар ХӨСҮТ-ийн Дархлаажуулалтын албаны дарга О.Дашпагама мэдээллээ.

Тэрбээр дархлаажуулалтыг бүрэн хамруулж байж тухайн халдварыг үндсээр нь таслан зогсоох боломжтойг онцолсон бөгөөд ДЭМБ-аас гаргасан тооцооллоор вакцины үр нөлөө өндөр байхын тулд хамрагдалт 95 хувиас дээш байх шаардлагатайг сануулсан. Тиймээс дархлаажуулалтад хамрагдаагүй бол аль болох хурдан хугацаанд вакцинд хамрагдахыг уриалж байна.

Гэвч олон нийтийн дунд тараагдаж буй ташаа, худал мэдээллүүдээс үүдэн эцэг эхчүүдийн дунд вакцины талаар буруу ойлголт түгээмэл байгааг албаныхан анхааруулж байна. Эдгээр ташаа мэдээлэлд автах нь халдварт өртөх эрсдэлийг нэмэгдүүлдэг тул мэргэжлийн байгууллагын өгч буй зөвлөмж, мэдээлэлд тулгуурлан шийдвэр гаргахыг зөвлөж байгаа юм.

Мөн дархлаажуулалтад хамрагдах боломж дараах байдлаар зохион байгуулагдаж байна:

• 11 настай хүүхдүүд: Товлолт дархлаажуулалтаар үнэгүй хамрагдана.

• 12-14 настай хүүхдүүд: Хоцорсон тохиолдолд нөхөн дархлаажуулалтад нэг тунгаар хамрагдана.

• 15-аас дээш насны хүүхдүүд болон насанд хүрэгчид: Сайн дурын үндсэн дээр, төлбөртэйгөөр вакцинд хамрагдана.

• 18-аас дээш насны эмэгтэйчүүд: Вирусийн халдваргүй бол лабораторийн шинжилгээ хийлгэсний үндсэн дээр вакцин хийлгэх боломжтой.

Эрүүл мэндийн байгууллагууд улс орон даяар дархлаажуулалтын ажил зохион байгуулж байгаа бөгөөд эцэг эх, асран хамгаалагчдыг хүүхдээ хугацаанд нь вакцинд хамруулахыг уриалж байна.

Эх сурвалж: ХӨСҮТ, Улсын хэмжээнд товлолт дархлаажуулалтын мэдээлэл.