Испанийн хөл бөмбөгийн шигшээ баг болон “Валенсиа” багийн домогт хөгжөөн дэмжигч Мануэль Касерес-Артесеро, олонд Маноло нэрээрээ танигдсан ахмад фэн 77 насандаа таалал төгсжээ. Тэрээр амьсгалын замын хүндрэлийн улмаас эмнэлэгт хэд хоног хэвтэн эмчлүүлсний эцэст нас барсан тухайгаа Испанийн шигшээ багийн хэвлэлийн алба албан ёсоор мэдээлсэн байна.
Маноло нь 1982 оноос хойш “Валенсиа” клубын үнэнч хөгжөөн дэмжигч болж, 2006 он хүртэл тус багийн бүх тоглолтыг үзэж байсан төдийгүй 1979 оноос хойш Испанийн шигшээ багийн гадаадад хийсэн тоглолтуудыг алгасалгүй дагалдан очсон ховор фен байв. Тэрбээр:
-
10 удаагийн Дэлхийн аварга шалгаруулах тэмцээнийг цэнгэлдэх хүрээлэнд үзсэн
-
8 удаагийн Европын аваргын тэмцээнд багийнхаа төлөө дэмжлэг үзүүлсэн
-
2018 оны ДАШТ-ээр ОХУ-д ирсэн
-
2022 оны Катарт болсон тэмцээнд эрүүл мэндийн шалтгаанаар очиж чадаагүй
-
2010 оны ДАШТ-ий чухал тоглолтыг хатгааны улмаас алгассан
Түүний шигшээ багийг дэмжсэн хамгийн сүүлчийн тоглолт нь энэ оны гуравдугаар сарын 23-нд болсон Испани, Нидерландын Үндэстнүүдийн лигийн шөвгийн наймын тоглолт байсан бөгөөд испаничууд торгуулийн цохилтоор ялалт байгуулсан юм.
“Гунигтай, баяртай аль ч үед биднийг үргэлж дэмжиж ирсэн хамгийн үнэнч хөгжөөн дэмжигч маань хорвоог орхин одлоо. Тайван нойрс доо, Маноло” хэмээн шигшээ багийн зүгээс гүн эмгэнэл илэрхийлсэн байна.
Эх сурвалж: TASS, Marca, Испанийн шигшээ багийн хэвлэлийн алба.
