Мехико хот “Формула-1” ангиллын авто уралдааныг зохион байгуулах гэрээгээ сунгаснаар уг тэмцээнийг ирэх гурван жилийн хугацаанд зохион байгуулахаар болжээ.
“Формула-1” группийн гүйцэтгэх захирал Стефано Доменикали "Мехикогийн Гран-При 2028 он хүртэл манай уралдааны нэг хэсэг хэвээр байх болно гэдгийг дуулгахдаа бид маш их баяртай байна" гэв. Мехико дахь хөгжөөн дэмжигчдийн ер бусын уур амьсгал нь манай тэмцээний хамгийн гайхалтай, эрч хүчтэй мөчүүдийн нэг байдаг хэмээн тэр нэмж хэлжээ.
Хотын дарга Клара Бругада "Мексикийн нийслэл бол "Формула-1"-ийн өлгий нутаг мөн" гээд Мехикогийн Гран-Пригээс 2025 онд 21 тэрбум песо буюу ойролцоогоор 1.1 тэрбум долларын орлого олох төлөвтэй байгааг мөн тэрбээр дурджээ. “Гран-При нь авто спорт сонирхогчдыг татахын сацуу манай хотын эдийн засгийг идэвхжүүлж, аялал жуулчлалын дэд бүтцийг бэхжүүлж, бидний бахархлыг төрүүлж байдаг” гэж хотын дарга хэлсэн байна.
Мехико хот нь далайн түвшнээс дээш 2200 м өндөрт оршдог бөгөөд сийрэг агаар нь турбо, хөргөлтийн систем, тоормос болон хурдаа авах зэрэгт нөлөөлдөг ажээ.
“Формула-1” уралдаан 23 жил завсарласны эцэст 2015 оноос Мехико хот дахь ах дүү Родригесийн нэрэмжит уралдааны замд дахин явагдаж эхэлснээр Латин Америкийн энэ орны хөгжөөн дэмжигчдийг баярлуулж байв.
Энэ оны Мехикогийн Гран-При тэмцээн 10 дугаар сарын 24-26-ны өдрүүдэд болно.
Эх сурвалж: France24
