FIBA буюу Олон улсын сагсан бөмбөгийн холбооноос зохион байгуулдаг эмэгтэйчүүдийн Азийн аварга шалгаруулах тэмцээн ирэх долдугаар сард БНХАУ-д болох бөгөөд энэ удаагийн тэмцээн 31 дэх удаагаа зохион байгуулагдаж, хоёр дивизонтой явагдана. Тивийн аваргын тэмцээний А дивизоны найман багийн зургаа нь 2026 оны дэлхийн аваргад оролцох эрхийн төлөө өрсөлдөх бол В дивизоны ялагч нь дараагийн удаагийн А дивизон руу дэвших эрх авах юм.

Өнгөрсөн жилийн В дивизоны аварга Индонез А дивизон руу дэвшсэнээр Тайванийн шигшээ баг 1984 оноос хойш анх удаагаа В дивизон руу унаж, энэ удаагийн тэмцээнд тоглохоор болсон байна. В дивизонд өрсөлдөх багуудыг тодруулах урьдчилсан шат дөрвөн бүс нутагт болж өнгөрсөн бөгөөд Монгол Улс тэдгээрийн нэгийг хүлээн авсан.

Улаанбаатар хотод болсон бүсийн тэмцээнд Монгол, Тайвань, Хонгконгийн шигшээ багууд өрсөлдсөнөөс Тайвань нэгдүгээр байраар шалгарч, шууд В дивизонд оролцох эрхээ авсан. Харин Монгол Улсын эмэгтэй шигшээ баг хоёрдугаар байраар шалгарсан бөгөөд энэ сарын 24-нд Монголыг В дивизонд тоглох эрхтэй болсныг FIBA албан ёсоор зарлалаа.

Энэ удаагийн В дивизонд Энэтхэг, Казахстан, Тайвань, Иран, Монгол, Тайланд, Күүкийн арлууд болон Таити улсын шигшээ багууд оролцох бөгөөд тэмцээний ялагч баг А дивизон руу дэвших эрхтэй болно. Харин А дивизонд Хятад, Япон, Австрали, Шинэ Зеланд, Өмнөд Солонгос, Филиппин, Ливан, Индонезийн шигшээ багууд өрсөлдөхөөр болжээ.

Тоглолтын хуваарь, хэсгийн оноолт удахгүй тодорхой болох бөгөөд Монголын шигшээ баг түүхэндээ анх удаа В дивизонд өрсөлдөх гэж буй нь эмэгтэй сагсан бөмбөгийн хөгжлийн хувьд чухал ахиц, сорилт болох юм.

Эх сурвалж: FIBA, Монголын сагсан бөмбөгийн холбоо