Өнөөдрийн Засгийн газрын хуралдаанаар улаанбурхан өвчний дэгдэлтийн эсрэг шуурхай хариу арга хэмжээ авах үүргийг холбогдох сайд нарт даалгалаа. Улсын хэмжээнд улаанбурхан өвчний халдвар эрчимтэй тархаж буйтай холбогдуулан дархлаажуулалт, эмнэлгийн бэлэн байдал, урьдчилан сэргийлэх арга хэмжээг эрчимжүүлэх шаардлагатай гэж үзжээ.

Тодруулбал:

• Эрүүл мэндийн сайд Т.Мөнхсайханд улаанбурхан өвчний дэгдэлтийг зогсоох, халдвараас сэргийлэхэд шаардлагатай эм, эмнэлгийн хэрэгсэл, оношлуур, вакцин, хүний нөөцийг бүрдүүлж, дархлаажуулалтын бодлого боловсруулан хэрэгжүүлэх үүрэг өгсөн байна.

• Боловсролын сайд П.Наранбаярт ерөнхий боловсролын сургууль, цэцэрлэгийн хүүхдүүдийг товлолын дагуу дархлаажуулалтад хамруулсан эсэхийг эрүүл мэндийн байгууллагуудтай хамтран шалгах, нөхөн дархлаажуулалтыг зохион байгуулах, мөн анги, танхимын эрүүл ахуйн нөхцөлийг сайжруулах чиглэлийн даалгавар өгчээ.

• Гэр бүл, хөдөлмөр, нийгмийн хамгааллын сайд Л.Энх-Амгаланд халдварын хариу арга хэмжээний хүрээнд оролцоотойгоор ажиллах үүрэг ногдуулсан байна.

Мөн улаанбурханы тандалт, дархлаажуулалт, хариу арга хэмжээний бэлэн байдлыг сайжруулах, шаардлагатай хөрөнгийн шийдвэрлэлтийг хийх, эрүүл мэндийн байгууллагуудад бүх шатанд дэмжлэг үзүүлэх, үндэсний товлолын дархлаажуулалтад иргэдийг идэвхтэй хамруулах арга хэмжээг зохион байгуулахыг холбогдох албан тушаалтнуудад даалгасан байна.

Эх сурвалж: Монгол Улсын Засгийн газар