Допингийн эсрэг үндэсний зөвлөл анхдугаар хуралдаанаа зохион байгуулж, дэлхийн допингийн эсрэг дүрэм, стандартын дагуу 2025 оноос эхлэн шинэ бүтцээр ажиллах Допингийн эсрэг комисс байгуулах шийдвэр гаргалаа. Энэ комисс нь зөвхөн хяналт тавихаас гадна сургалт, сурталчилгаа, урьдчилан сэргийлэх чиглэлийн хөтөлбөр хэрэгжүүлэхээр төлөвлөж байна.
Монгол Улс 2007 онд Улсын Их Хурлаар баталсан “Спортод допинг хэрэглэхийн эсрэг олон улсын конвенц”-д нэгдсэнээр олон улсын түвшинд допингийн эсрэг үүрэг хүлээж эхэлсэн. Үүний хүрээнд 2017 онд батлагдсан Биеийн тамир, спортын тухай хуульд допингийн эсрэг үйл ажиллагааг хуулийн дөрөвдүгээр бүлгийн 21 дүгээр зүйлд тусгаж, төрийн бодлогын нэг хэсэг болгожээ.
Энэ бодлого нь:
-
Тамирчдын эрүүл мэндийг хамгаалах
-
Шударга өрсөлдөөний орчныг бүрдүүлэх
-
Монгол Улсын олон улсын нэр хүнд, байр суурийг хамгаалах чухал ач холбогдолтой гэж үздэг.
2023 онд батлагдсан Биеийн тамир, спортын тухай хуулийн шинэчилсэн найруулгад энэ чиглэлийн зохицуулалтуудыг бүхэлд нь нэгтгэж, тавдугаар бүлэг хэлбэрээр тусгасан нь допингийн эсрэг тэмцлийг илүү цогц, бодлогын түвшинд хэрэгжүүлэх нөхцөлийг бүрдүүлсэн юм.
Шинэ комисс байгуулагдсанаар Монгол Улсад допингийн эсрэг үйл ажиллагааг олон улсын жишигт нийцүүлэн шинэ шатанд гаргах, урьдчилан сэргийлэх, боловсролын ажлыг тогтмол, тогтолцоотойгоор хэрэгжүүлэх боломж бүрдэхээр байна.
Эх сурвалж: Допингийн эсрэг үндэсний зөвлөл
