Дэлхийн спортын нэр хүндтэй “Лаурес” шагнал гардуулах ёслол Мадрид хотноо болж, 2024 оны шилдэг тамирчид тодорлоо. Олимпын долоон удаагийн аварга, Америкийн гимнастикч Симона Байлз эмэгтэйчүүдийн, харин тулгууртай харайгч, Шведийн Арман Дюплантис эрэгтэйчүүдийн шилдгээр шалгарч, Laureus World Sports Academy академийн шагналыг хүртлээ.

Шагнал гардуулах ёслолд дараах тамирчид, багууд онцгойрчээ:

• Оны шилдэг баг: Испанийн “Реал Мадрид” клуб нь Аваргуудын лиг болон Испанийн дотоодын тэмцээнд түрүүлсэн амжилтаараа энэ номинацид ялалт байгуулсан.

• Оны нээлт: Европын аваргаар тодорсон Испанийн шигшээ багийн бүрэлдэхүүнд багтсан, “Барселона” клубийн хагас хамгаалагч Ламин Ямал.

• Шүтээн номинац: Испанийн теннисчин Рафаэл Надаль. Тэрбээр нийт 92 удаа мэргэжлийн тэмцээнд түрүүлсний 22 нь Их дуулгын тэмцээн бөгөөд Олимпын хошой аварга, Дэвисийн цомын дөрвөн удаагийн эзэн юм.

Тамирчдын амжилтыг товчхон харвал:

• Симона Байлз: Дэлхийн аваргад нийт 23 удаа түрүүлсэн, түүхэн дээд амжилт эзэмшигч.

• Арман Дюплантис: Дэлхийн хошой, Европын гурван удаагийн аварга бөгөөд 6 м 27 см-ийн дэлхийн дээд амжилт тогтоосон.

“Лаурес” шагнал анх 1999 онд үүсгэн байгуулагдсан бөгөөд эхний шатанд спортын сэтгүүлчдийн сонгон шалгаруулалт, дараагийн шатанд 50 нэр хүндтэй ахмад тамирчнаас бүрдсэн академи санал өгдөг уламжлалтай.

Оросын тамирчдаас өмнө нь 2007, 2009 онд Елена Исинбаева “Шилдэг эмэгтэй тамирчин”, харин 2001 онд Марат Сафин “Шилдэг шинэ нээлт” шагналыг хүртэж байжээ.

Эх сурвалж: ТАСС