Халдварт өвчин судлалын үндэсний төвийн Эрт сэрэмжлүүлэг, хариу арга хэмжээний нэгжийн дарга Н.Сувдмаа өнөөдөр улаанбурхан өвчний халдварын нөхцөл байдал нэмэгдэх хандлагатай байгааг анхаарууллаа. Түүний мэдээлснээр, улаанбурхан өвчний 479 тохиолдол бүртгэгдээд байгаа бөгөөд хавьтагчдын тоо 10 мянга давжээ. Одоогоор 166 хүн эмнэлэгт, 11 хүн гэрээр эмчлүүлж байгаа бол өвчлөгчдийн дийлэнх нь 10-14 насны хүүхдүүд байна.

Улаанбаатар хотоос гадна Хэнтий, Дундговь, Төв, Баянхонгор, Өмнөговь аймагт халдвар бүртгэгдээд байна. Шинэ тохиолдол бүртгэгдэх бүрд ХӨСҮТ цахим болон орон нутагт газар дээр нь очиж үзлэг, тусламж үзүүлж байгаа бөгөөд ДЭМБ-ын зөвлөхүүдтэй хамтран Өмнөговь, Дундговь аймагт ажиллаж байна.

Мөн тэрбээр Өмнөговь аймгийн Цогтцэций сумын уурхайд бүртгэгдсэн хоолны хордлогын сэжигтэй тохиолдлын талаар мэдээлэл өглөө. Уг суманд байрладаг дөрвөн хоол хүнсний үйлчилгээний компанийн ажилчдын дунд хордлогын шинж тэмдэг илэрч, нийт 197 хүн өвчилжээ. Үүнээс 150 гаруй хүн эмнэлэгт, 44 хүн гэрээр эмчлүүлж байна. Өвчлөгсдийн ихэнх нь 20-48 насныхан бөгөөд тэд гүйлгэх, халуурах, гэдэс базлах, дотор муухайрах зэрэг шинж тэмдгээр өвчилсөн байна.

ХӨСҮТ-өөс зургаан хүний бүрэлдэхүүнтэй мэргэжлийн багийг газар дээр нь илгээж, халдварын голомтод эрсдэлийн үнэлгээ хийж, шалтгаан нөхцөлийг тодруулан ажиллаж байна.

Эх сурвалж: ХӨСҮТ