Хойд Америкийн Үндэсний хоккейн лигийн “Вашингтон Кэпиталз” клубийн довтлогч Александр Овечкин Канадын домогт тоглогч Уэйн Гретцкигийн дээд амжилтыг эвдсэнтэй холбогдуулан багийн удирдлагууд түүнд алтан цохиур бэлэглэлээ.

Ёслол “Вашингтон”-ы мөсөн талбайд болсон бөгөөд багийн үйл ажиллагаа эрхэлсэн захирал Брайан Маклеллан энэхүү шагналыг гардуулсан байна. Овечкин дөрөвдүгээр сарын 6-нд “Нью-Йорк Айлендерс”-тай хийсэн тоглолтын үеэр 895 дахь гоолоо оруулж, NHL-ийн бүх цаг үеийн хамгийн олон гоол оруулсан тоглогч болсон юм.

Ёслолд түүний ээж, Олимпын аварга Татьяна Овечкина, эхнэр, хадам эцэг, хүүхдүүд болох Сергей, Илья нар оролцсон бөгөөд хөвгүүдэд нь алтан цохиурын жижиг загварыг бэлэглэсэн байна. Харин багийн эзэн Тед Леонсис Овечкины гэр бүлийнхэнд талархал илэрхийлж, ээж, эхнэрт нь цаг, Овечкинд түүний дүрс бүхий шайб дурсгасан аж.

Мөн ёслолын өмнө дэлгэцээр Овечкин дээд амжилт тогтоосон мөч, түүнийг баяр хүргэж буй багийн нөхөд болон Гретцкигийн сэтгэгдэл бүхий бичлэгийг танилцуулжээ.

Эх сурвалж: ТАСС