Хэдэн арван жилийн турш эвдэгдэхгүй мэт санагдаж байсан домогт хоккейчин Уэйн Грецкийн дээд амжилтыг Александр Овечкин дөрөвдүгээр сарын 6-нд эвдэж, Үндэсний хоккейн лигийн (NHL) түүхэнд хамгийн олон гоол оруулсан тоглогч боллоо. “Вашингтон Кэпиталз” багийн ахлагч тэрбээр “Нью-Йорк Айлендерс”-ийн хаалганд өөрийн 895 дахь шайбыг хийснээр 39 насандаа шинэ түүхийг бичив.

Түүхэн мөч: Грецкийн амжилтыг хэрхэн эвдэв

Овечкин “Нью-Йорк Айлендерс”-ийн эсрэг тоглолтын хоёрдугаар үед багийн хамтрагчаас дамжуулалт хүлээн авч хүчтэй шидэлтээр хаалгыг мялаасан тэр агшин NHL-ийн түүхэнд шинэ хуудсыг нээсэн юм. Уг гоол нь түүний 895 дэх шайб байсан бөгөөд энэ нь Уэйн Грецкийн 894 гоолын амжилтыг давсан үзүүлэлт юм.

Ёслолын бэлтгэл: NHL бүх нийтийн анхаарал хандуулжээ

Овечкины амжилтыг урьдчилан тооцож, NHL болон “Вашингтон Кэпиталз” баг олон долоо хоногийн турш техник, медиа баг бүрдүүлэн тусгай ёслолын бэлтгэл хийж байв. ESPN, TNT зэрэг томоохон сувгууд “OviCast” хэмээх тусгай камер ажиллуулан Овечкиныг бүх талаас нь баримтжуулж, энэ түүхэн мөчийг бодит цагийн нэвтрүүлгээр дамжуулжээ.

Спортын суут замнал: гэр бүл, хөдөлмөр, алсын хараа

Овечкин 1985 оны есдүгээр сард Москва хотод олимпийн хошой аварга эх, хөлбөмбөгч аавын гэр бүлд төрсөн бөгөөд гурван настайдаа хоккейн цохуур атгаж, таван настайдаа “Динамо Москва”-гийн спортын сургуульд элсэн оржээ. Ахынхаа гэнэтийн үхлийн дараа тэр хоккейн замналаа ахынхаа дурсгалд зориулж үргэлжлүүлсэн гэдэг.

Тэр 2004 онд NHL-ийн драфтад №1-ээр “Вашингтон Кэпиталз”-т элсэж, анхны улирлаасаа л гайхалтай амжилтаар онцгойрсон. Спортын замналынх нь оргил нь 2018 онд багтаа Стэнлийн цом авчирсан түүхэн ялалт байлаа.

Овечкины онцлох амжилтуудаас:

• 895 гоол – NHL-ийн түүхэнд хамгийн олон гоол оруулсан тоглогч

• Стэнлийн цомын аварга (2018) – “Вашингтон Кэпиталз”-ыг анх удаа цомд хүргэв

• Дэлхийн гурван удаагийн аварга – 2008, 2012, 2014 онуудад Оросын шигшээтэй

• Морис Ришар Трофи – NHL-ийн шилдэг мэргэн буучаар 9 удаа тодров

• Харт Трофи – улирлын хамгийн үнэтэй тоглогчоор 3 удаа нэрлэгдсэн

• 35 наснаас хойш гурван улирал дараалан 40+ гоол оруулсан цорын ганц тоглогч

Грецкийн 894 гоолыг давсан амжилтыг Овечкин 1486 тоглолтоор, харин Грецки өөрийн амжилтыг 1487 тоглолтоор хийж байсан нь анхаарал татаж байна.

Александр Овечкин өнөө цагийн хамгийн алдартай, нэр хүндтэй хоккейчнуудаас нэгэн төдийгүй дэлхийн спортын түүхэнд мөнхөрсөн домогт тамирчин болж байна.

Эх сурвалж: Iz.ru, REUTERS, РИА Новости.