Дэлхийн Эрүүл Мэндийн Байгууллага (ДЭМБ) 1948 оны дөрөвдүгээр сарын 7-нд анх байгуулагдсан бөгөөд энэ өдрийг дэлхийн нийтээрээ “Дэлхийн эрүүл мэндийн өдөр” болгон жил бүр тэмдэглэдэг уламжлал тогтжээ. Тус өдрийг олон улсын түвшинд зохион байгуулснаар хүн амын эрүүл мэндийн асуудлыг хэлэлцэх, улс орнуудын Засгийн газар, байгууллагууд болон олон нийтийн анхаарлыг эрүүл мэндийн салбарт төвлөрүүлэх зорилготой юм.
Монгол Улс энэхүү өдрийг сүүлийн 50 гаруй жилийн турш тасралтгүй тэмдэглэж ирсэн бөгөөд эрүүл мэндийн боловсрол, урьдчилан сэргийлэх үзлэг оношилгоо, олон нийтэд чиглэсэн арга хэмжээнүүдийг зохион байгуулж иржээ.
2025 онд энэхүү өдрийг “Эрүүл эхлэл, итгэлтэй ирээдүй” уриан дор тэмдэглэж байгаа нь хүн бүр эрүүл амьдралын хэв маягийг сонгож, амьдралынхаа эхлэлээс эрүүл мэнддээ анхаарч, итгэлтэй ирээдүйг бүтээхэд уриалж буй үйл ажиллагаа болж байна. Уриа нь нийгмийн бүхий л бүлгийн оролцоог дэмжиж, эрүүл мэндийн салбарын тогтолцоог бэхжүүлэх, тогтвортой хөгжлийг дэмжих зорилготой юм.
Эх сурвалж: ДЭМБ, Эрүүл мэндийн яам
