Зэвсэгт хүчний хоёр алба хаагч Монгол орны дөрвөн зүгийн хязгаарыг улсын төв цэгтэй холбох 5000 км хэт холын марафонд гарлаа. Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, 234 дүгээр ангийн гүүрчин аврагч, спортын мастер, дэд ахлагч Б.Буянхишиг нарын гүйгчид өчигдөр Баян-Өлгий аймгийн Алтай таван Богдын Сонгинотын даваанаас гараанаас гарсан байна.

Гарааны үеэр Өлгийн цэргийн хүрээний алба хаагчид тэднийг дэмжин, эхний 15 км замыг хамт гүйж урам хайрлажээ. Энэхүү түүхэн гүйлтээрээ тэд:

• Баруун цэгээс зүүн цэг болох Дорнод аймгийн Соёлз уулын Модот хамар хүртэл 3280 км замыг 63 хоногт,

• Хойт захын Хөвсгөл аймгийн Монгол шарын даваанаас өмнөд захын Өмнөговь аймгийн Орвог гашууны Бор толгой хүртэл 1720 км замыг 36 хоногт туулна.

Гүйлтийн нийт урт 5000 км байх ба өдөрт дунджаар 50-55 км замыг туулах тооцоотой. Тэдний замд нийт 11 аймгийн 40 сум, мөн 5 аймгийн 23 сумын нутгийг хамруулах бөгөөд долоодугаар сард буюу Үндэсний их баяр наадмын өмнө барианд хүрэх зорилготой байна.

Эх сурвалж: ЗХЖШ