Хойд Америкийн Үндэсний хоккейн лигийн (NHL) “Вашингтон Кэпиталз” багийн ахлагч, Оросын довтлогч Александр Овечкин “Бостон Брюинз” багтай хийсэн тоглолтын 16 дахь минутанд шайб оруулж, нийт 891 гоолтой боллоо. Ингэснээр тэрбээр NHL-ийн түүхэн дэх хамгийн олон гоол оруулсан Уэйн Гретцкигийн (894 гоол) амжилтад ердөө 3 гоол дутуу болоод байна.
39 настай Овечкин энэ улиралд 38 гоол, 26 дамжуулалт хийжээ. Энэ тоглолтод “Вашингтон” 4:3-аар ялалт байгуулсан бол Овечкин 140 дэх удаагаа нэг тоглолтод 3 ба түүнээс дээш оноо авсан нь түүнийг лигийн түүхэнд 19 дүгээрт бичүүлж байна.
Түүнчлэн:
-
30 наснаас дээш оруулсан гоолын тоогоор NHL-ийн дээд амжилт тогтоож (416 гоол), Канадын домогт Горди Хоугийн (415 гоол) амжилтыг давсан.
-
NHL-ийн түүхэнд нэгдүгээр үед оруулсан гоолын тоогоор У.Гретцкигийн 241 гоолын амжилтыг давжээ.
Одоогоор “Вашингтон” баг 74 тоглолтоос 105 оноо авч, Нийслэлийн дивизионыг тэргүүлж байгаа бөгөөд улирал дуусах хүртэл 8 тоглолт үлдээд байна. Дараагийн тоглолтоо 4-р сарын 3-нд "Каролина Харрикейнз" багийн эсрэг хийнэ.
NHL-ийн комиссар Гэри Беттмэн өмнө нь мэдэгдэхдээ: “Овечкин дээд амжилтад 4 гоол үлдэх тэр мөчөөс эхлэн Гретцкитэй хамт тоглолтыг үзнэ” гэж байв.
Эх сурвалж: ТАСС
