Монголын Үндэсний худалдаа аж үйлдвэрийн танхим (МҮХАҮТ) Монголын шатрын холбоотой хамтран “Алтан бэрс” цомын төлөөх корпорацуудын аварга шалгаруулах анхдугаар шатрын тэмцээнийг зохион байгуулж байна. МҮХАҮТ-ын 65 жилийн ойн хүрээнд зохион байгуулагдаж буй уг тэмцээн өнөөдөр нээлтээ хийж, 24 топ байгууллагын 120 шатарчин оюуны ур чадвараа сорин өрсөлдөж эхэллээ.

208 сая төгрөгийн шагналын сантай тус тэмцээн нь стратегийн сэтгэлгээ, багийн ажиллагаа, хурц ухааныг нэгэн дор цогцлоосон анхны шатрын арга хэмжээ болж байна. Тэмцээнд түрүүлсэн баг 2025 онд болох корпорацуудын ДАШТ-д Монгол Улсаа төлөөлөн оролцох эрх авах юм. Энэ нь Азид анх удаа зохион байгуулагдаж буй корпорацийн шатрын тэмцээн гэдгээрээ онцлогтой.

Тэмцээнд их мастер Б.Гүндаваа, С.Билгүүн, Г.Мөнхгал, Б.Мөнгөнтуул, олон улсын мастер Ү.Агьбилэг, Н.Баттулга зэрэг нэр бүхий 24 легионер шатарчин оролцож, өндөр түвшний тоглолт үзүүлж байна.

Ерөнхийлөгчийн Тамгын газрын дарга, Монголын шатрын холбооны ерөнхийлөгч Г.Занданшатар “Шатар бол хиймэл оюун ухаан хөгжсөн өнөөгийн үед үнэ цэн нь улам нэмэгдэж буй оюуны спорт. 2025 оныг Дэлхийн шатрын холбоо ‘Бүх нийтийн шатрын жил’ болгон зарласан. Энэ тэмцээнийг ‘Алтан бэрс’ хэмээн нэрийдсэн нь учиртай. Бэрс бол шатрын хамгийн хүчирхэг дүр. Түүх, археологийн олдворууд ч шатрын үүсэл Монголтой холбоотой болохыг баталж байна” гэж онцоллоо.

МҮХАҮТ-ын ерөнхийлөгч Ц.Төрбат тэмцээнийг жил бүр уламжлал болгон зохион байгуулна гэдгээ илэрхийлж, “Ирэх жилүүдэд оролцогчдын тоо нэмэгдэнэ гэдэгт итгэлтэй байна. МҮХАҮТ шатрын холбоотой түншлэн олон тэмцээн зохион байгуулна” гэж мэдэгдлээ.

“Алтан бэрс” тэмцээний цомыг Монгол Улсын 20 дахь шатрын аварга С.Мөнхбат санаачлан хийлгэж, алтаар бүрсэн, Монголын соёлын бэлгэдлийг шингээсэн бүтээл болсныг тэмцээний үеэр танилцуулсан байна. Швейцар системээр есөн өрөг тоглогдох тус тэмцээний аваргууд маргааш тодорно.

Эх сурвалж: МҮХАҮТ, Монголын шатрын холбоо.