АНУ-ын Флорида мужийн Алачуа хотод зохион байгуулагдаж буй хөнгөн атлетикийн мастеруудын “World Masters Athletics Indoor Championships-2025” тэмцээнд Монгол Улсын гавьяат тамирчин Ц.Раднаа хос алтан медаль хүртлээ. Энэхүү долоо хоногийн турш үргэлжилж буй олон улсын томоохон тэмцээнд тэрбээр 90-95 насны ангилалд 60 болон 800 метрийн гүйлтийн төрөлд түрүүлж, төрийн дууллаа эгшиглүүлэв.

Ц.Раднаа энэ тэмцээнд нийт зургаан төрөлд оролцохоор бүртгүүлсэн бөгөөд 200, 400, 1500 метрийн гүйлт болон гурвын харайлтын төрөлд уралдах хэвээр байна. Дэлхийн дээд амжилтыг эзэмшдэг тэрээр өмнө нь олон улсын тавцанд Монгол Улсын нэрийг олон удаа гаргаж байснаараа олонд танигдсан билээ.

Тухайлбал, 2023 оны арваннэгдүгээр сард түүний амьдрал, замналд тулгуурлан бүтээсэн “Цагаан зээрийн янзага” баримтат кино нээлтээ хийж, олны анхаарлыг татсан. Мөн тэрбээр 85 насандаа Польшид болсон хөнгөн атлетикийн мастеруудын дэлхийн аваргад оролцон гурван алтан медаль хүртэж, түүхэн амжилт тогтоосон анхны монгол хүн болсон юм. Үүнээс хойш Ази тивийн олон улсын тэмцээнд 17 удаа дээд амжилтыг эзэмшиж байв.

Эх сурвалж: World Masters Athletics Indoor Championships-2025.