Хойд Америкийн Үндэсний хоккейн лигийн (NHL) “Вашингтон Кэпиталз” багийн ахлагч, Оросын довтлогч Александр Овечкин “Виннипег Жетс” багтай хийсэн тоглолтод шайб оруулж, 889 дэх гоолоо бүртгүүллээ. Ингэснээр тэрбээр NHL-ийн түүхэнд хамгийн олон гоол оруулсан хоккейчин Уэйн Гретцкигийн 894 гоолын дээд амжилтад ердөө 5 гоол дутуу болж байна.

39 настай Овечкин ийнхүү түүхэн амжилтад дөхөж байгаа ч “Вашингтон” энэ тоглолтод нэмэлт цагт 2:3 харьцаагаар хожигдсон. Тоглолтын III үед Овечкин гоол оруулсан бол түүний багийн Эндрю Манжапане эхний үед гоолдсон. Харин өрсөлдөгч “Виннипег Жетс” багийн Жош Моррисси, Мэйсон Эпплтон, Николай Элерс нар тус бүр нэг гоол оруулжээ.

“Вашингтон Кэпиталз” болон “Виннипег Жетс” багууд энэ улиралд амжилттай тоглож, хоёулаа Стэнлийн цомын плей-оффт шалгарсан. Вашингтон 71 тоглолтод 103 оноо авч, Дорнод конференц болон Нийслэлийн дивизионд тэргүүлж байгаа бол Виннипег 72 тоглолтод 102 оноотойгоор тэргүүлэгчдийн эгнээнд багтжээ.

Цаашид:

• “Вашингтон Кэпиталз” баг гуравдугаар сарын 28-нд “Миннесота Уайлд” багтай тоглох,

• “Виннипег Жетс” баг 29-нд “Нью-Жерси Дэвилз” багийг талбайдаа хүлээн авах хуваарьтай байна.

NHL-ийн 2024 оны улирал дуусах хүртэл Вашингтон баг нийт 11 тоглолт хийх бөгөөд энэ хугацаанд Овечкин Гретцкигийн дээд амжилтыг даван туулах боломжтой хэвээр байна.

Эх сурвалж: ТАСС